Enforcer nga nangilkil posibleng kasohan

CEBU, Philippines — Posible nga pasakaan og kaso ni Cebu City Transportation Office Head Raquel Arce ang usa ka traffic enforcer nga nakuhaan og video nga giingong nangilkil na usab og laing motorista diha sa Sanciangko Street bisan og gitang-tang na kini sa serbisyo niadtong Hulyo 1, 2026.

Si Arce nagkanayon nga dili na niya dawaton sa iyang buhatan ang enforcer nga si Jover Te Lofrance kinsa usa ka job order employee nga nagsugod lang niadtong Marso 2026.  Gikatahong napamatud-an nga si Lofranco unang nangilkil og P100 sa usa ka motorista diha sa Pahina San Nicolas.

Nakita ni Arce ang mas tin-aw nga kopya sa video human nihatag mismo ang biktima niadtong Hunyo 30, 2026 diin makita nga nisita si Lofranco sa usa ka motorista nga adunay angkas nga babaye tungod sa kalapasan apan dili madeklara sa enforcer tungod kay wala kini niisyu og citation ticket.  Gipadayag ni Arce nga nakuha ang pag-estorya ni Lofranco ngadto sa motorista nga “kung isyuhan tika, kinahanglan ni nimo nga i-settle within 3 days unya mobayad ka ani og P1,000. Pero kong dili, ma-file-lan ka og kaso, P3,000 nasad ang imong bayran. Pero kong mohatag ka, dili tika isyuhan”.

Madungog usab sa maong video nga dali nga nibungat si Lofranco og kantidad aron dili na maimbargo ang lisensiya sa motorista kong mohatag lang kini og P100 hangtud sa P500.

Aron nga mahuman ang ilang panag-estorya kang Lofranco nitunol ang nag-angkas og P100 tungod kay giingong nagdali kini ug ang pagdawat ni Lofranco sa kwarta nakuha kini sa video.  Si Arce nagkanayon nga gipakauwawan ni Lofranco ang tibuok departamento sa CCTO hinungdan nga gitang-tang kini sa serbisyo.

Bisan pa sa pahibalo ni Arce pinaagi sa iyang Facebook page nga wala na’y katungod si Lofranco nga manakop og motorista diha sa kadalanan apan nakuhaan gihapon kini og video niadtong Hulyo 1, 2026 nga nanakop diha sa Sanciangko Street.

Kagahapon, niadto si Lofranco buhatan sa CCTO ug gipangsurender ang iyang ID ug citation tickets. Matud ni Arce nga nitug-an si Lofranco kaniya nga natental lang kini sa pagpangayo sa mga madakpang motorista bugti sa pagpasaylo nga nakalapas kini sa balaod sa trapiko.  Ug gumikan sa gibuhat ni Lofranco gilantaw ni Arce nga pasakaan kini og kaso nga usurpation of authority.

 Padayon usab si Arce sa pakig-alayon sa mga nadakpan ni Lofranco ug naghuwat kini nga adunay moduso og formal complaint batoka kang Lofranco. BDB BANAT NEWS