Brown ipaparada ng Titan Ultra
PBA Governors’ Cup imports kumpleto na
MANILA, Philippines — Kumpleto na ang 13 imports na sasalang sa paparating na PBA Season 50 Governors’ Cup na magbubukas sa Hulyo 10 sa Ynares Center sa Antipolo City.
Ito ay matapos kunin ng Titan Ultra si 6-foot-6 reinforcement Tirrell Brown na sumabak sa mga liga sa Argentina, Bolivia, Chile, Colombia, Ecuador at Uruguay.
Sa kanyang collegiate years ay naglaro ang 32-anyos na si Brown sa University of Central Arkansas bago lumipat sa Ouachita Baptist University.
Kaagad masusubukan ng Giant Risers si Brown sa kanilang pagsagupa sa Terrafirma Dyip sa pagsisimula ng season-ending conference.
Nagposte ang Titan Ultra ni coach Rensy Bajar ng malamyang 2-10 record sa nakaraang PBA Commissioner’s Cup kasama si import Michael Gilmore.
Pansamantalang kinuha ng nagdedepensang Tropang 5G si Darius Days sa pagrekober ni Rondae Hollis-Jefferson sa kanyang injury, habang muling aasahan ng Barangay Ginebra si resident import Justin Brownlee.
Ang iba pang imports na lalaro ay sina George King (San Miguel), DeQuan Jones (NLEX), Aaron Fuller (Rain or Shine), Jordon Varnado (Meralco), KJ Buffen (Magnolia), Kentrell Barkley (Blackwater), Justin Strings (Terrafirma), Jalen Hudson (Converge), BJ Johnson (Phoenix) at De’Vondre Perry (Macau).
Ibinalik ng PBA sa group format ang torneo kung saan magkakasama sa Group A ang Ginebra, Rain or Shine, Meralco, Magnolia, Blackwater at Phoenix.
Ang Group B ay binubuo ng TNT, San Miguel, NLEX, Converge, Terrafirma, Titan Ultra at guest team Macau.
- Latest
