Lalaki gipusil patay

CEBU, Philippines — Usa ka 39-anyos nga lalaki ang nakit-an nga patay sa daplin sa baybayon sa Sitio Ratan, Barangay Tangke, Talisay City, sayo sa buntag sa Miyerkules, Hunyo 3.

Ang biktima giila nga si Julius Cabradilla, nga adunay samad pinusilan sa ulo.

Base sa inisyal nga imbestigasyon, adunay mga residente sa lugar nga nakadungog og sunod-sunod nga buto sa pusil mga alas-3 sa kaadlawon.

Mga duha ka oras ang milabay, nadiskobrehan ang lawas sa biktima sa baybayon. Positibong giila ang biktima sa iyang kapuyo.

Sa pakighinabi sa mga tigbalita, ang iyang kapuyo miingon nga kataposan niyang nakita ang biktima sa Martes sa gabii sa wala pa siya matulog.

Wala siya makabantay nga nigawas ni sa ilang balay ug wala usab siya kahibalo kon asa kini miadto.

Gikompirmar usab sa babaye nga mao ra gihapon ang sinina nga gisul-ob ni Cabradilla sa dihang nakit-an ang iyang lawas.

Nakarekober ang mga imbestigador og tulo ka basiyo sa bala duol sa nahimutangan sa patay’ng lawas sa biktima.

Giproseso sa mga operatiba sa Scene of the Crime Operatives (SOCO) ang crime scene ug nangolekta og mga ebidensiya alang sa padayong imbestigasyon.

Sa pagkakaron, wala pay gipagawas nga opisyal nga report ang Talisay City Police Station kabahin sa maong insidente.

Padayon pang gisuta sa mga awtoridad sa ilang imbestigasyon sa kamatayon ni Cabradilla lakip na ang pagtino sa motibo sa krimen ug sa mga posibleng pag-ila sa mga mamumuno. (BANAT NEWS)