Naigo sa kilat, patay

CEBU, Philippines — Nakabsan sa kinabuhi ang usa ka mananagat human kini naigo og kilat sa Sitio Takot Kamamsaan, Barangay Tarong, lungsod sa Madridejos sa Isla sa Bantayan niadtong Biyernes sa hapon, Mayo 29, 2026.

Giila sa mga otoridad ang namagay nga mao si Sammy Batiancilla Santillan, 51-anyos, residente sa Purok Bakhaw, Barangay Kodia sa maong lungsod.

Matud pa ni Police Captain Jec Seares, hepe sa Madridejos Police Station, usa  ka Benie Illustrisimo Auman, 27, nga manguha unta og lambay ang nakakita sa biktima Biyernes sa buntag.

Sa adlaw sa  aksidente, nipagawas na og advisory bahin sa thunderstorm ang Visayas Regional Services Division sa Philippines Atmospheric Geophysical and Astronomical Services Administration (PAGASA) pinaagi sa ilang official Facebook page sa alas 10:00 sa buntag niadtong maong adlaw. Cheny Labrador

Sa maong advisory, giingon nga dako ang posibilidad nga motumaw ang grabeng mga thunderstorms o pagpanugdog ug kilat sa Sugbo sulod sa 12 ka oras.

Dugang pa sa saksi, samtang didto si Santillan sa iyang pumpboat, kalit kining naigo sa kilat nga maoy hinungdan sa iyang kamatayon.

Suma pa ni Police Captain Seares, base sa giiingon sa pamilya sa biktima ug sa mga kaubang mananagat namasol ang biktima anang tungora nga gituhuang maoy gidakop sa kilat.

Apan, sa usa ka interview sa usa ka vlogger kang Ronald Santillan, igsuon sa biktima, di ni motuong naigo og kilat ang iyang igsuon kay wala masunog ang lawas niini.

Basi sa ubang mga kaso sa mga mananagat nga naigo ug namatay tungod sa kilat, nasunog ilang mga sinina ug lawas.

Pero gitug-an niya nga naay samad sa agtang ang iyang igsuon ug nagduda kini nga naparok sa pump boat ang iyang igsuon human naigo og kilat ang sakayan kay naay mga parte niini nga naguba.

Gideklarar kining patay na sa attending physician sa Madridejos Rural Health Unit (RHU) alas 1:30 sa hapon human madala sa daplin. (BANAT NEWS)