Archival mipasidaan batok “rentangay”

CEBU, Philippines — Mipasidaan si Cebu City Mayor Nestor Archival ngadto sa mga car rental operator sa syudad batok sa nagkadaghang kaso sa gitawag og “rent-tangay scam” kun diin ang mga suspek morenta og sakyanan apan wala diay plano nga ibalik sa tag-iya.

Matud pa ni Archival pinaagi sa usa ka Facebook niadtong Mayo 28, 2026 nga adunay mga insidente diin ibaligya ang mga girentahang sakyanan gamit ang peke nga mga dokumento, hinungdan nga daghang negosyo sa car rentals ang naapektuhan ug nakasinati og dakong pagkalugi.

“Sa Cebu car rental operators, magbinantayon ta. As your mayor, dili ta magpabaya ani,” pulong pa sa mayor.

Gibutyag usab ni Archival nga nakig-alayon na ang kagamhanan sa Highway Patrol Group-7 ug sa Philippine National Police aron mapalig-on ang monitoring ug mapaspasan ang pagrekober ug pagbawi sa mga nakawat nga mga sakyanan.

Nakig-alayon sab ang syudad uban sa mga car rental groups aron makahimo og mas lig-on nga alert system alang sa tanang operators sa Cebu. Gihangyo sa mayor ang mga operator nga maghimo og paghugtan ang seguridad sa ilang mga kabtangan pinaagi sa pag-verify pag-ayo sa mga ID sa renter o mangabang, kinahanglan nga butangan og GPS trackers ang mga parentahan nga unit, ug dili magpagawas sa sakyanan kung kuwang ang requirements.

Giawhag usab niya ang publiko ug mga negosyante nga mo-report dayon sa mga otoridad gamit ang 911 hotline kung dunay mga kadudahan hitabo o mga transaksyon.

“Ang inyong negosyo mao’y panginabuhi sa inyong pamilya ug importante kaayo na sa atong syudad. Dili mo nag-inusara ani. Magtinabangay ta aron maprotektahan ang atong mga Cebuano entrepreneurs,” dugang pa ni Archival.

Kagahapong adlawa, na-recover sa kapolisan ang usa ka SUV nga usa sa duha ka sakyanang gipangita sa nahitabong “kidnapping” sa Barangay Banilad ug napasakaan na og kaso ang unom ka mga gipasanginlang nalambigit niini.

Gitapos sa mayor ang iyang mensahe pinaagi sa pag-awhag sa tanan nga magpabiling alerto ug magtinabangay aron mapadayon ang kaluwasan ug kaayohan sa Dakbayan sa Sugbo. —  IBM BANAT NEWS