Ginebra, TNT mag-abot sa Finals

MANILA, Philippines —  Ang TNT Tropang Giga ug ang Barangay Ginebra Kings mitagak sa tagsa-tagsa nila ka mga karibal hinungdan nga sila maoy mag-abot sa kampiyonato sa PBA Commissioner's Cup niadtong Biyernes sa gabii didto sa Smart Araneta Coliseum sa Quezon City.

Si Rondae Hollis-Jefferson mipabuto og 42 puntos samtang sila si Calvin Oftana ug Rey Nambatac midugang og 12 puntos matag usa sa dihang gipatikangkang sa TNT ang Rain or Shine Elasto Painters sa hingpit uban ang 97-92 nga kadaogan sa Game 5.

Gihuman sa Tropang Giga ang serye sa baraha nga 4-1 aron pag-abante sa Commissioner's Cup Finals sa unang higayon sud sa unom ka tuig.

Ang Ginebra maoy nagbarog sa dalan sa Tropang Giga ngadto sa gihandum nilang trono.

Sama sa TNT, ang Gin Kings mipalagpot sa NorthPort Batang Pier pinaagi sa 4-1 rekord kortesiya sa 126-99 nga demolisyon sa Game 5.

Si Justin Brownlee ang nangu sa balanseng opensiba sa Ginebra bitbit ang 21 puntos, 11 ka rebounds, tulo ka assists ug tuo ka steals.

Mirehistro si RJ Abarrientos og double-double nga 20 puntos ug 10 ka assists, si Jamie Malonzo milansang og upat ka 3-pointers sa iyang 20 puntos samtang si Japeth Aguilar midonar og 18 puntos alang sa Gin Kings, nga nakakuha sab og tinigum nga 25 puntos gikan nilang Scottie Thompson ug Troy Rosario.

Ang Gin Kings ug ang Tropang Giga magsugod sa ilang best-of-seven championship series karong Marso 14 didto sa Mall of Asia Area sa Pasay City.