Lapu-Lapu expressway hayan masugdan na og trabaho

CEBU, Philippines — Himoon na karong Hunyo 14, 2024 ang groundbreaking ceremony sa katukuran sa Lapu-Lapu Expressway (LLEX) project.

Gipahibawo kini ni Lapu-Lapu City Mayor Junard "Ahong" Chan sa mga tigbalita sa gihimong pagpakighinabi kaniya niadtong miaging adlaw.

Sa nasayran wa mahinayon ang unang gitakda nga groundbreaking niini nga tambongan unta ni Presidente Ferdinand “Bongbong” Marcos atol sa Ika-503 nga Kadaugan sa Mactan niadtong Abril 27, 2024.

Ang maong proyekto nagkantidad og P25 bilyones nga giisip nga labing unang proyekto nga namugna gawas sa Luzon ug Mindanao ug gilauman nga maoy makahatag og kasayon sa pagbiyahe paingon ngadto sa Mactan Cebu International Airport (MCIA) nga maoy mosumpay gikan sa Cebu (CCLEX) pagpaingon ngadto sa airport.

Ang LLEX nga adunay 12 ka kilometro nga expressway nagikan sa Barangay Babag 2 ug motadlas ngadto sa Mactan Export Processing Zone (MEPZ) ug Mactan Aviation Road, barangay Pajac, Buaya, Bankal, Ibo ug motapos usab sa Barangay Pusok.

Kini gilauman nga makapakunhod sa 35 minutos nga pagbiyahe gikan sa siyudad sa Sugbo ngadto na lamang sa 12 minutos nga pagbiyahe paingon sa MCIA.

Si Mayor Chan miingon nga ang mga motorista nga mo-agi sa CCLEX nakasinati og kalangan tungod sa traffic sa Marigondon ug Kalawisan apan masulbad na kining maong problema sa trapiko sa pagpaingon sa MCIA pinaagi sa tukoron nga Skyway project.  MEL BANAT NEWS