Apura itinakas ang MVP Sports sa Ginebra Boys sa pagbubukas ng PBAPC Raffy Japa Cup

MANILA, Philippines – Ibinuslo ni Allan Apura ang isang go-ahead triple sa huling 13.4 segundo para akayin ang MVP Sports Foundation sa come-from-behind 60-58 overtime win sa Ginebra Boys sa pagdribol ng PBAPC Raffy Japa Cup na inihahandog ng Burlington kahapon sa Ninoy Aquino Stadium.

Tumapos si Apura, isang TNT ballboy at bata ni RR Pogoy, na may 31 points kasama ang 27 sa second half at nagtala rin ng 4 steals, 3 assists at 2 rebounds.

Kumabig si NLEX support staff member JR Delicano ng 10 points, 11 rebounds, 3 steals at 2 shot blocks para sa 1-0 record ng MVP Sports na bumangon mula sa 15-point deficit sa Ginebra sa first half.

Ang Ginebra Boys ay pinamunuan ni Kings’ conditioning coach Paul Mendoza sa kanyang 14 points at 17 rebounds at tumipa si assistant coach Patrick Partosa ng 14 points, 15 rebounds, 5 steals, 3 assists at 1 shot block.

Ginawa nina SMC Sports Director Alfrancis Chua at Lee Japa, kapatid ng namayapang si Raffy Japa, ang kauna-unahang presidente ng PBA Press Corps, ang ceremonial toss sa torneong suportado ng Rain or Shine, Philippine Sports Commission, PBA at LGR.

Binuksan ni PBAPC President Vladimir Eduarte ng Abante Group of Publications ang torneo.

Dumalo sina dating PBAPC heads Tito S. Talao, Noli Cortez at Gerry Ramos.