Natinuod ang atong gikahadlokan. Ang mga paningkamot sa pagtarong sa operasyon sa Motor Vehicle Inspection Center (MVIC) sa land Transportation Office Central Visayas (LTO 7) gisabotahe na.
Apan sukwahi sa gituohan nga ang dagkong operators sa pamasaherong mga sakyanan ang unang mokisikisi ug magpalaban sa ilang mga padrino nga dagkong opisyal sa gobyerno, ang unang nibukubuko ni LTO 7 Assistant Regional Director Arnel Tancinco mao ra sab ang iyang kaubanan sa buhatan. Kansang mga raket nahulga sa pagtuman na sa MVIC sa iyang mandato pag-inspeksiyon sa tanang sakyanan—pribado, pamasahero o sa gobyerno man.
***
Ang mga opisyal sa LTO 7 nga nahudlat sa katakos, kaisog ug kaligdong ni Tancinco nagpalaban ni LTO 7 Regional Director Raul Aguilos. Kinsa wa maglangay pagluwat og memorandum. Nga wa nay apil sa inspeksiyon sa MVIC ang pribadong mga sakyanan sa Lapu-Lapu City ug Talisay City.
Gipasabot ni Aguilos nga layo rang MVIC, nga naa mahimutang sa Subangdaku, Mandaue City, gikan sa mga motorista sa Lapulapu ug Talisay. Di siya gustong mahasol ang ilang mga kliyente. Maong gitugotan niya ang mga buhatan sa LTO sa Lapu-Lapu ug Talisay nga mao na lay mo-inspeksiyon sa pribadong mga sakyanan.
***
Ambot kinsay naka-ulug-ulog ni Aguilos nga duna siyay gahom sa pagsukwahi sa administrative order sa ilang ulohang buhatan sa LTO nga nagmando nga ang tanang sakyanan kinahanglang moagi sa MVIC alang sa inspeksiyon sa di pa malab-as ang ilang rehistrasyon. Di niya magamit nga sukaranan ang kapakyas sa karaang MVIC pagsusi sa pribadong mga sakyanan sa Lapu-Lapu ug Talisay kay siya ang labing nahibawo sa kataphaw ug kakurakot sa operasyon sa MVIC sa wa pa mobanos pagduma si Tancinco sa niaging semana.
Gihagit nako si Aguilos paghingan sa mga tag-iya sa pribadong mga sakyanan nga iyang giingong nangreklamo sa kalayo sa MVIC. Wa siyay laing nanganlan gawas ni Lapu-Lapu City Administrator Teddy Ybañez.
***
Nga nakapadugang sa pagduda nga ang tinuorayng utok ug gipahinungdan sa memorandum ni Aguilos mao si Lapu-Lapu LTO Chief Aurea Angcay. Mga kawani sa LTO sa Lapu-Lapu gipasanginlan nga gawas nga way klarong nagsusi sa mga sakyanan, nangolekta pa gyud og kantidad nga mas dako kay sa nasuwat sa resibo. Si Angcay mismo gikiha atubangan sa Visayas Ombudsman tungod sa giingong pagrehistro og mga sakyanan bisan kuwang ang mga dokumento.
Gusto kong motuo nga tarong si Aguilos. Nga lisod lang limpiyohan ang iyang buhatan. Apan naglibog ko nganong wa siyang kabadlong sa nagbaha nga fixers. Inutil ba lang siya? O nakabahin gyud sa dakong panguwarta? Nganong mora man og dunay espesyal nga luna silang Angcay ug ubang kontrobersiyal nga mga opisyal sa kasingkasing ni Aguilos?
***
Email: leo_lastimosa@abs-cbn.com