Sayop si Kongresista Tomas Osmeña. Ang panag-uban nilang Konsehal Edgardo Labella ug Atty. Roberto Palmares sa usa ka kaso wa magpasabot nga kauban sila sa tanang kaso. Sama sa ubang mga abogado, gawasnon silang magkuyog o mag-atbang sa nagkalainlaing kaso.
Bisan ang ilang panag-uban sa usa lang ka buhatan di babag alang nilang Labella ug Palmares sa pagpili sa managlahi nga mga posisyon sa samang kaso. Bisan di motoo si Osmeña, mahimong tinuod gyod nga nagkasungi ang hubad nilang Labella ug Palmares sa kontrobersiya sa pagpanag-iya sa 4.7 ka ektarya nga luna sa San Miguel, Apas, Cebu City.
* * *
Sakto si Labella. Mahimong wa siya’y nalapas nga lagda sa abogasiya. Sa iyang pakig-ipon ug pakig-atbang ni Palmares. Salig ko sa katakos ni Labella pagpanalipod sa iyang kaugalingon gikang Osmeña o ni bisan kinsang nagduda nga gibinuangan niya ang 168 ka pamilya nga gimandoan na sa korte paglayas sa ilang pinuy-anan.
Amaw hinuon si Labella. Kun mokubit sa hagit ni Osmeña pagkiha og libelo aron kapamatud-an ang iyang nahuptang dokumento sa panag-uban nilang Labella ug Palmares sa labing menos usa ka kaso. Di tungod kay way sukaranan ang kaso. Kun dili tungod kay makadaot ni sa iyang politikanhong ambisyon.
* * *
Kay sayop si Labella. Sa wa niya pagtug-an dayon sa mga molupyo nga gihulga og demolisyon ug, labaw sa tanan, sa Sugbuanong mga botante. Nga maoy mohukom i-promote ba siya pagka bise mayor sa 2013.
Demalas si Labella. Kay naunhan siya ni Osmeña. Ang hubad ni Osmeña sa panagluon nila og buhatan ni Palmares maoy unang nadunggan sa mga Sugbuanon. Maglisod na si Labella pagpapas sa nitumaw nga pagduda nga, kun di pa tungod sa pangespiya ni Osmeña, taguon untang Labella ang kasikit niya sa abogado nga responsable sa kalisod ron sa pagpuyo sa taga Apas.
* * *
Sakto si Osmeña. Ang kontrobersiya sa Apas nakapahukas sa tinuod nga bulok ni Labella. Nga makapabuslot sa kaligdong nga giisip nga usa sa alas sa umaabot nga runningmate ni Mayor Mike Rama. Iyang kalit nga pagsud sa kaso, nga ni Rama pa aron pagpanalipod sa mga molupyo, nangalisbo nga pahimus, kinaham nga sakit sa tradisyonal nga mga politiko.
Wa igdungog si Palmares nga hilumon, ni manggiuwawon, sa iyang mga kasong gihuptan. Kay makadungog man si Labella bisan sa igham ni Palmares sud sa ilang buhatan, hagbay ra untang nahibawo ining kasoha. Nganong wa man magpakabana niadto pa? Karon na ba lang modugo ang iyang kasingkasing ug gitugkan og kaluoy alang sa mga molupyo nga nakahukom na sa pagpangambisyon og mas taas nga katungdanan sa politika?
* * *
Email: leo_lastimosa@abs-cbn.com