Maayo g’yud nga suportahan sa tanang Local Government Units ang tinguha ni Konsehal Edgardo Labella nga ipa-repeal sa Supreme Court ang lagda nga dili mahimong ibulgar ang katigayonan sa mga justices kon walay pagtugot sa Supreme Court en banc.
Husto si Labella nga ang Republic Act 6713 tataw kaayo nga naglatid nga ang mga kawani sa kagamhanan nga sakop sa executive, legislative ug judiciary, apil na gani ang mga Constitutional officials, maisip nga public officials.
Busa, isip mga public officials o kaha kawani sa kagamhanan, klaro kaayo nga sila apil sa kinahanglang modeklarar sa ilang Statement of Assets, Liabilities and Networth (SALN) unya dili mahadlok kon mohatag niini ngadto sa publiko.
Isip direktor kaniadto sa Ombudsman, wala malilong alang ni Labella ang lagda sa Section 8 sa Republic Act 6713, kon Code of Conduct and Ethical Standards for Public Officials and Employees, nga ang mga SALN mahimong hilngon sa publiko.
Wala makagusto si Labella nga atol sa nagpadayong impeachment trial ni Supreme Court Chief Justice Renato Corona nabutyag nga dili basta-basta nga ibutyag ang unod sa mga SALN sa mga justices.
Basi sa Supreme Court En Banc Resolution pinitsahan og May 2, 1989 mahimo lang mabutyag sa publiko ang SALN sa mga justices kon adunay pagtugot sa Supreme Court en banc.
Taphaw ra kaayo ang rason sa mga justices nga dili kuno nila gusto nga sayon-sayon ra nga ibutyag ang ilang SALN kay basin og gamiton kini sa mga tawo nga nasuko kanila.
Apan tan-awa karon og unsay resulta. Nabutyag sa balita nga si Corona dunay mga katigayonan nga gituyo niya sa pagpagamay ang kantidad. Dili kini tumo-tumo kay nabulgar kini atol sa impeachment trial.
Dili pa ba kini basihanan nga angay’ng wad-on na ang maong lagda sa Supreme Court? Alang nako, gaan kaayo ang rason sa mga justices sa Supreme Court aron dili sayon-sayon nga matan-aw sa publiko ang ilang SALN.
* * *
Maayo tingali nga susihon g’yud pag-ayo sa kadagkoan sa Firearms Explosives, Security Agencies and Guards Supervisory Section (Fesags) ang mga gwardya sa lainlaing ahensya nga gi-detail sa mga balay-patigayon.
Kinahanglan nga kadtong masakpan nga nakahimo og kalapasan silotan gikan sa multa ngadto na sa pagrebokar sa ilang lisensya. Daghan pa nga mga private security agency nga hangtod karon migamit pa og armas nga buhat ra dinhi sa ato.
Ang ubang binuang mao nga ang mga tagdumala sa security agency mokuha sa armas nga giisyu nila sa usa ka balay-patigayon. Ang sangpotanan niini wala nay magamit ang hingtungdang gwardya kon gikinahanglan.
Angay kini nga aksyonan mentras sayo pa, kay sa unya ra maaksyonan kon duna nay mga panghitabo.
Diri sa opisina sa The FREEMAN, girekomendar g’yud nako ngadto sa among manager nga ang Filipinas Security Agency maoy kuhaon kay abi ba nako og morespeto sila kay kaila man nako ang tag-iya niining maong ahensya.
Apan utro pa man diay nga badlongon. Tiaw mo, pito ni sila ka gwardya apan usahay hatagan lang og usa ka armas sa ilang ahensya? Maayo ra ba og nindot nga armas, klaro kaayo nga “locally-made” ug nindot pa ang akong armas nga wala na gamita.
Unsa may gamiton sa mga gwardya kon dunay mga dautang tawo nga moatake diri sa among opisina kay nasuko nga naigo sila sa komentaryo? Maayo lang kining maong security agency sa bag-o pa kay “pistol” g’yud ang gibutang nga armas.
Dugay na kaayo ko nga naghangyo sa management niining maong security agency kay kaila lagi ang tag-iya, apan dili na tingali maantos pa kay ang gihuna-huna nila mao ra ang pagpadatu sa kaugalingon ug wala maghuna-huna sa seguridad sa ilang kliyente.
Akong lauman nga human niining akong lindog, magtinarong na unta kamo diha sa Filipinas Security Agency ug nga unta si Senior Superintendent Rex Derilo mosusi kon lisensyado ba ang armas nila.
Ang Duty Detail Order (DDO) nga iisyu sa tagdumala sa ahensya ngadto sa gwardya, paresan g’yud na og kopya sa lisensya sa armas. Apan matud sa mga gwardya wala kini himoa sa ilang ahensya.