Tungod sa kadaghan sa mga naigo sa lapad nga baha sa Sugbo niadtong Martes, ug tungod sa kalisod sa pagpada sa naghinobrang mga hinabang ngadto sa mga biktima sa bagyong Sendong sa Negros Oriental ug Northern Mindanao, nakahukom mi sa pagpanghatag og mga hinabang sa kaliboan ka pamilya nga gibahaan sa mga dakbayan ug kalungsoran sa Sugbo.
Nanghinaot mi nga makasabot ang mga Sugbuanon nga nanghatag sa nagbuntaog nga mga hinabang sa Kapamilya Relief Campaign.Kay kon nitabang sila sa mga biktima sa katalagman sa lagyong mga dapit, nakaseguro ko nga di sila mosupak kon hatagan sa ilang hinabang ang mga biktima sa baha dinhi sa atong kaugalingong nataran.
***
Unang nahatagan namo og food packs ang kapin sa gatos ka pamilya nga naabtan sa baha ug nidangop sa tulo ka evacuation centers sa Basak, Lapulapu City.Nahatdan sab og food packs ang dul-an sa 500 ka pamilyang nabahaan sa tulo ka barangay sa Consolacion:Ang Cansaga, Pitogo ug Lower Nangka.1,200 sab ka food packs ang naapud-apod sa mga biktima sa baha sa mga barangay Poblacion ug San Roque sa Dakbayan sa Talisay.Ug nahatag nang food packs alang sa kapin sa 300 ka pamilya nga gibahaan sa Barangay Mabolo sa Dakbayan sa Sugbo.
Ang food pack—nga naglakip sa duha ka kilong bugas, tulo ka putos nga noodles ug duha ka lata nga sardinas—igo na nga makapalahutay sa matag pamilya samtang naningkamot pagtimbakuwas gikan sa katalagman.
***
Sa usa lang ka adlaw, inabagan sa lokal nga mga opisyal, naka-apud-apod mi og hinabang alang sa dul-an sa 3,000 ka pamilya nga nabiktima sa baha sa nagkalainlaing bahin sa Sugbo.Paspas kaayo kon itandi sa komplikadong proseso sa pagpada sa mga hinabang ngadto sa Negros Oriental ug Northern Mindanao.
Wa hinuon namo pasagdi ang ubang mga biktima sa bagyong Sendong.Nagpaabot lang mi nga makadawat na og dugang hinabang ang Cagayan de Oro ug Iligan ug nga may mas dakong barko nga makatingob og hakot sa nahibiling mga hinabang alang sa Dumaguete ug ubang bahin sa Negros Oriental.
***
Gihangyo namong Philippine Navy pagpada sa Sugbo sa usa sa mas dagko nilang barko aron matingob ang pagpada sa mga hinabang alang sa mga biktima sa bagyong Sendong.Kay ang tanang dagkong barko gidestino na man sa Northern Mindanao, naglisod ang Navy sa pagsanong sa among sugyot.
Gitabangan mi sa Sugbuanong Energy Undersecretary Ina Asirit pagkumbinser sa Navy nga di pasagdan ang mga biktima ni Sendong sa Negros Oriental.Gitanyagan mi nila og gagmayng barko.Nga mas gamay og kapasidad kay sa usa ka container van.Sa kasamtangan, padayong anam-anam nga pagpada sa mga hinabang pinaagi sa commercial vessels ug trucking services.
***
Email: leo_lastimosa@abs-cbn.com.