Mosuporta g’yud ko sa awhag nga did-an na ang paggamit og mga dagko kaayo nga sound boxes nga sagad gamiton kon dunay mga disco diha sa lainlaing lugar.
Gihisgutan nako kining maong isyu kay dunay mga nagpuyo sa Citylights Gardens, kanang upat ka tag-as kaayo nga condominium ibabaw sa bungtod sa barangay Apas, nga mireklamo sa kusog kaayong tugtog sa disco.
Kay dia man ko magpuyo duol ra kaayo niining maong mga tag-as nga building, nasabtan nako kon hain ang gireklamo nga saba kaayo atol sa nagsingabot pa ang fiesta ni Santo Niño niadtong Enero.
Atbang ra man gud kaayo sa Citylights Gardens ang sitio Santo Niño nga nahimutang likod nga bahin sa Marco Polo Plaza Hotel ingon man ang kapilya sa barangay Busay.
Dungan-dungan ra ang fiesta sa maong mga kapilya ug matag gabii dunay lainlaing kalihokan, sama sa disco nga gigamitan og amplifier nga gikonektar sa dagko kaayong mga speaker.
Aw saba g’yud hinoon kaayo ilabi na nga ang tugtog mga binag-o nga wala g’yoy “lami.” Ambot unsaon pagtratar sa mga opisyal sa dakbayan kining maong awhag nga hunongon na ang paggamit og mga dagko kaayo nga sound boxes.
Alang kanako, walay problema kon magpahigayon sila og matag gabii nga disco atol sa pangadye sa ilang kapilya, basta gagmay lang nga speaker ang ilang gamiton.
* * *
Maayo unta og matambagan sa kadagkoan sa Cebu City Transportation Office (CCTO) kining pipila nila ka sakop nga mohimo pagpanakop.
Kaniadto gu’ng Dominggo may nakit-an ko nga CITOM enforcer nga nagsige og pamara’g mga taxi. Wala lang ko mangutana og unsay salaod nga nahimo sa drayber.
Nalipay ko kay gidakop niya kon nakahimo man og kalapasan ang maong mga drayber. Apan ang ako lang “concern” mao ang pamaagi niya sa pagdakop.
Dili ko ignorante kon unsay detalye nga gikinahanglan aron isuwat diha sa mga Traffic Citation Tickets (TCT) ug sa Temporary Operator’s Permit (TOP).
Mahimo ra kini nga suwaton nga dili molapas og dos minutos kon gusto ka g’yud nga moisyu.
Gikan ko nga misimba sa Basilica del Santo Niño. Daghan na nga taxi ang gipara sa maong traffic enforcer diha sa dalan D. Jakosalem. Nagpasumangil ko nga namili og mga sapatos nga ukay-ukay apan ang tuyo nako aron mapanid-an unsay lihok sa maong enforcer.
Pwerteng dugaya nakaisyu og TCT sa drayber. Dugay siya nga nagbarog diha mga tunga sa dupa ang gilay-on gikan sa driver’s seat ug dayon milakaw og hinay paingon sa luyo nga bahin sa taxi.
Didto pwerteng dugaya. Hangtod nga nanaug na lang ang drayber ug nagsultihanay sila. Mga 10 minutos tingali g’yud ang pag-standby sa maong taxi dapit sa usa ka eskena.
Unsay nakadugay? May higala nako sa CITOM nga miingon nga mao g’yud kana ang modus sa uban niyang mga kauban nga dugay-dugayon ang pag-isyu aron “modugo” ang drayber.
Kon nakasala man ang drayber, diha pa lang tupad kaniya sultihi siya sa iyang salaod human nimo makuha ang lisensya. Isuwat ang iyang ngalan diha sa TCT o TOP.
Dayon moadto ka sa luyo o atubangan aron pagtan-aw sa plate numbers, dayon isuwat ang iyang salaod, ug ang dapit nga diin siya madakpi, ang oras ug petsa.
Unya, papirmaha dayon ang drayber. Kon dili mopirma, ibutang sa “remarks” nga “refuse to sign” ayaw na’g dugay-dugaya kay aron walay magduda nga nagpaabot ka’g suborno.
Kon ako’y modakop og drayber, dili abtan og usa ka minuto ang pag-isyu nako’g TOP ug anha ra ko moisyu nga magtan-aw ug maminaw ang mga pasahero aron walay trampas.
Kining ako tambag lang aron nga walay makasaway sa mga magtan-aw kaninyo. Isip kauban sa kawsa paghatag og leksyon sa mga masalaypong drayber, pahibaw-on ko kamo nga dunay wala makagusto sa inyong lihok sa pagdakop og drayber.
Tiaw mo, dunay tawo nga nagsige’g tan-aw ug nagpahiyom. Nadunggan g’yud nako nga miingon, “Mangwarta na sa’b na tingali.” Wala g’yud mohatag og kwarta ang drayber apan sa pagdugay-dugay nimo’g isyu sa TCT o kaha TOP, dili nimo kalikayan nga may magduda.
* * *
Maayo bitaw nga hatagan g’yud og unang pagtagad sa mga sakop sa Bids and Awards Committee ang mga purchase request gikan sa Cebu City Medical Center ug sa City Health Department.
Kon mga tambal gani ang gi-request gikan sa maong mga departamento dili kini maayong dugay-dugayon. Grabe kaayo kay maabtan kuno’g lima ngadto sa unom ka buwan usa maaprobahan ang request.
Mao kana ang rason nga ang atong CCMC ug City Health dili kompleto og mga tambal. Apan dili usab makapalit og tambal ang CCMC sa dinaghan kay “kakha-tuka” man ang syudad.
* * *
Email: birador_freeman@yahoo.com