Motoo ako nga ang mga dagkong negosyante dili ganahan nga motukod og mga patigayon sa mga dapit nga nakasinati og grabe nga problema sa trapiko.
Ang nakaingon sa grabeng problema sa trapiko mao ang pagdaghan sa mga sakyanan unya dili kaayo lapad ang atong mga karsada, apan nakatampo usab sa problema ang mga abusadong drayber.
Ang pagdaghan sa mga sakyanan nagpasabot nga milambo ang kahimtang sa mga lumolupyo sa maong dapit. Tinuod bitaw.
Kaniadto lang, gamay ra kaayo ang dunay mga sakyanan sa mga kawani sa The FREEMAN, apan karon maglisod na kami’g parking sa among grahe.
Timailhan kini nga miasenso ang kadaghanan ug gamay na lang kami nga nabiyaan sa maayong kapalaran. Unsaon nga kon sa sugal pa nga hantak sila ra man ang sige nga “giharian.”
* * *
Samtang ang pagpalapad sa mga karsada katungdanan kini sa kagamhanan pinaagi sa Department of Public Works and Highways (DPWH) ingon man sa mga local government units, ang kampanya batok sa mga abusadong drayber iya sa mga traffic enforcement units.
Kon ang mga opisyal sa DPWH nagkuwang sa ilang serbisyo, ang mga traffic authorities nato pinaagi sa mga magpapatigayon nagpakabana pagsulbad o kaha maminus-minus ang problema kabahin sa mga abusadong drayber.
Giuyonan sa mga traffic managers atol sa paghulma nila sa Metro Cebu Traffic Council nga awhagon nila ang masi’g nila ka opisyal nga tugotan sila nga inay traffic citation tickets ang gamiton, Temporary Operators Permit na ang iisyu sa mga masalaypong drayber.
Apan dinhi sa dakbayan sa Sugbo mora’g walay gana si Mayor Michael Rama nga ipatuman kining maong lakang.
Usa sa rason ni Rama mao nga dili siya gusto nga ang mga traffic enforcers sa dakbayan himoon na lang g’yud nga agents sa LTO unya ila pa g’yud ang multa nga makolekta gikan sa mga drayber.
Politiko man gud si Rama mao nga natural dili siya mopabor sa mga kalihukan nga daghan ang apektado. Apan kon mouban ka mayor sa operation sa LTO, ambot og dili ba kaha mausab ang imong baruganan.
Sayonan ka nga bisan ang mga drayber nasayod man g’yud unta nga wala itugot nga mag-drive og sakyanan nga walay lisensya ug walay rehistro ang sakyanan apan apil ang mga polis ug sakop sa Citom nga mihimo niini.
Unya dunay mga drayber nga wala lang g’yud magpakabana nga mosiga ang ilang suga atubangan ug luyo sa sakyanan kon magdagan sila sa karsada panahon sa gabii.
Ang nakapait pa g’yud kay bisan ang mga sakyanan sa Citom ug sa kapolisan maoy utro pa nga malapason sa balaod. Ayaw ko’g ingna mayor Mike nga wala ka makakita niining maong talan-awon?
Ang pag-isyu gud og traffic citation ticket ngadto sa mga drayber nga makahimo’g kalapasan sa lagda sa trapiko mahimo man nga unya-unyaon na lang pagbayad.
Aw aron pagsuta kon nagtug-an ba ako sa tinuod mahimong mandoan nimo mayor Mike ang nagdumala sa Traffic Violations Bureau (TVB) nga hatagan ka og statistics kon pila ang wala mamayad sa ilang violations.
Motugot ka ba diay mayor Mike nga kataw-an ra sa mga drayber ang atong mga traffic enforcers? Kataw-an ra sila kay kon traffic citation tickets gud ang gamiton dili man masakmit ang ilang lisensya.
Mao nga dili lang usab nila tagdon ang pagbayad sa ilang multahan. Apan kon TOP gani, mapugos man g’yud sila’g lukat kay kon dili nila lukaton wala sila’y lisensya.
Anhi karon mosulod ang “priority” kon hain ang atong palabihon, ang pagdisiplina sa mga abusadong drayber o ang pagkolekta og multa gikan kanila aron mahipunta sa dakbayan.
Ang gisugyot sa mga sakop sa Metro Cebu Traffic Council tulo ra man usab ka buwan nga “experimental.” Tugotan lang tingali nato mayor Mike ug panid-an nato kon epektibo ba usa kita mosupak.
Ang mahadlok sa hugtanay nga kampanya batok sa mga abusadong drayber kadto ra man usab nga mga abusado. Ang mga buotan dili man gayud mahadlok kay dili man sila madakpan.
Dunay mga desisyon si Mayor Mike nga gidayeg nako sama sa pagpahapsay sa atong aseras, apan mao lagi wala siya magmalampuson kay nagpadaug gihapon sa hilak-hilak sa mga opisyal sa Cebu City United Vendors Association nga iyang mga political supporters.
Kon ingon niini ang imong pamaagi mayor Mike, mag-anad sila. Natural man g’yud na nga dunay mohilak sa pagpatuman sa balaod apan daghan ang malipay.
* * *
Email: birador_freeman@yahoo.com