Naglisud g'yud tawon ang mga sakop sa Squatters Prevention Encroachment Elimination Division (SPEED) pagpatuman og "one side vending" sa dalan Colon ug ubang bahin sa downtown area.
Tungod kini sa kagahi sa ulo sa ubang vendors nga nagtoo nga sila maoy adunay dakung katungod sa pagpaninda sa aseras kay sa mga tawo nga moagi sa maong agianan.
Ang problema misamot kay dunay pipila ka kawani sa City Hall nga miabiso na usab nga dili usa pasudlon sa dalan Colon ang mga sakop sa SPEED nga gipangulohan ni Noel Artes.
Naunsa baya tawon kining mga tawhana uy. Angay kini nga susihon ni Mayor Michael Rama kay kon magpirmi, sila maoy makaingon nga dili magmalampuson ang iyang gidamgo nga paghawan sa Colon Street.
Awhagon nako kanunay si Artes nga paningkamotan g'yud niya nga mahawan ang atong mga aseras.
Gipaskinan na ni Artes ang mga sidewalk vendors nga sugod karong Agosto 23 sakmiton na sa SPEED ang ilang mga karomata, lingkoranan ug mga baligyanan kon makit-an nga anaa kini gibilin ra sa aseras lapas sa alas 11 sa gabii.
Unya, kadtong mga gwardya sa lainlaing mga balay-patigayon, hunonga na ninyo ang pagbutang-butang og mga pisi nga koralon ninyo ang aseras atubangan sa balay-patigayon nga inyong gibantayan.
Kon kamong mga gwardya wala pa gani masayod, ako kamong pasabton nga gilatid sa balaod nga ang tag-iya sa balay-patigayon nga inyong gibantayan kinahanglan gayud nga mogahin og agianan alang sa publiko.
Pananglit inyong koral-koralon ang aseras, asa na man lang moagi ang mga tawo? Natural mapugos na lang ang mga tawo nga adto moagi daplin sa karsada? Kon mag-uwan, unsay mahitabo?
Awhagon nako ang katawhan nga kon makakita gani kamo og aseras nga koral-koralon sa mga gwardya, ipatangtang g'yud. Ingon niini ang akong buhaton kon duna ko'y makit-an.
Unya, kinahanglan usab nga ang City Hall mag-monitor kanunay sa mga balay-patigayon kang kansang mga tag-iya wala motuman sa ordinansa nga kinahanglang sug-an g'yud nila ang ilang aseras panahon sa gabii.
Natan-aw nako nga kon hingpit na nga mahawanan sa SPEED ang atong aseras, maangkon ni mayor Rama ang mga pagdayeg.
Sama gud ni kanhi Mayor Tomas Osmeña nga gipakita niya ang "political will" kaniadto dihang gipaguba niya ang mga tindahan sa mga Santo Niño vendors kilid sa Basilica, daghan ang nangalipay.
Nasayod ko nga mag-ukon-ukon si Rama paghimo og mga hukom nga makadaut sa iyang politikanhong ambisyon.
Apan angay nimo nga hinumdoman mayor Mike nga luyo sa kasuko sa pipila ka tawo, mas daghan ang mopagakpak kanimo.
* * *
Tan-awa ra gud ang sitwasyon sa Fort San Pedro plaza tupad sa Plaza Independencia, nindot na kaayo kon itandi nimo kaniadto nga pwerteng laksota dihang giukopar kini sa mga tindahan.
Kaniadto dihang ang daplin sa Fort San Pedro plaza giukopar pa sa mga tindera nga nagpaburot sa ilang kaugalingong bulsa, gisigehan nako kini og saway kay nakatampo sila sa kalaksot sa dakbayan.
Karon, pwerteng nindota na sa maong dapit nga giwagtang ang maong mga tindahan ug gibutangan na og nindot kaayong koral nga may suga panahon sa gabii.
Kadtong gikan sa pantalan nga makaagi sa maong dapit makaingon g'yud nga nindot kaayo ang dakbayan sa Sugbo. Apan kon mga laksot kaayo nga barung-barung o tindahan ang mosugat sa ilang panan-aw, pastilan.
Tinuod nakatabang kini sa panginabuhian, apan pipila ra ka pudyot ang nakapahimulos. Mahal ra ba kaayo og baligya nga unta wala man sila mag-abang sa ilang nahimutangan.
Mao kini ang mga tawo nga dili maayong pabaligyaon diha kay una (a) wala sila motuman sa balaod, ug ikaduha (b) ang ilang pag-estar nakapabati sa atong syudad.
Kon gusto kamo nga maninda sa aseras, himoa nga uniporme ang inyong mga tindahan ug kinahanglan nga dili laksot tan-awon.
* * *
Congrats diay sa 888 News Forum kay upat ka tuig na kini karong adlawa. Duna kini'y kalihukan karong adlawa diha sa Marco Polo Plaza Hotel human sa news forum nga sugdan alas 8:30 sa buntag. Giimbitar ko ni Brod Ricky Rama Poca, ang host sa 888 News Forum, nga motambong.
* * *
Email: birador_freeman@yahoo.com