Nalooy ko nga maghuna-huna sa mga lumulopyo diha sa Banilad ug Talamban apil na sa ubang mga silingang lugar nga siguradong mahasol kun sugdan na pagpatuman ang “odd-even scheme” diha sa Gov. Mariano Cuenco Avenue.
Kadtong mga tawo nga nanag-iya lang og usa ka sakyanan, ug bisan kadtong nanag-iya og duha ka kotse apan parehong “even” o kaha “odd” number ang katapusang numero sa ilang plate numbers, apektado gihapon.
Pananglit adto ka moagi sa alternative routes nga gitagana sa Department of Public Works and Highways (DPWH) madak-an g’yod sa gasto kay gawas nga molayo ang ilang daganon, sigurado pa nga traffic kaayo sa maong karsada.
Maayo na lang tingali nga mosakay na lang og passenger jeepney, apan duna sa’y mga PUJ nga dili makaagi sa Banilad-Talamban Highway ug kinahanglan sila nga mosubay sa alternative routes paingon dinhi sa syudad.
Dili lalim ang pagpaabot sa unom ka buwan hangtud nga mahuman ang maong proyekto nga pagtukod og flyover project diha sa Banilad. Nagpasabot kini nga sa pagbukas sa klase sa Hunyo, mga pinili gihapon ang sakyanan nga paagion diha.
Pananglit karong adlawa ang paagion mao ang mga sakyanan kang kansang plate numbers nagtapos og “even numbers,” inigkaugma, ang nagtapos na usab og “odd numbers” maoy paagion diha sa Banilad.
Niadtong wala makasabot sa termino nga “odd numbers” mao kini ang 1, 3, 5, 7, ug 9. Ang “even numbers” 2, 4, 6, 8, ug giapil na lang ang 0.
* * *
Tambag nako niadtong nagplano paghimo’g binuang, ayaw ipadayon ang inyong nahuna-hunaan kay mosamot ra kamo og kaproblema.
Sayonan ka nga dunay sakyanan sa among silingan nga wala na padagana kay naguba ang makina, gitangtangan og plate numbers sa bilyako nakong amigo kay kuno maoy gamiton niya paglingla sa mga traffic enforcers.
Kay “even” number man ang kataposan sa numero diha sa plate numbers sa sakyanan sa akong amigo, nadani siya nga tangtangon ang plate numbers niadtong sakyanan nga wala na magdagan kay “odd” number man.
Aw sigurado ko nga mosalir ang maong paagi apan basin og dili kini makaabot sa unom ka buwan.
Madakpan gani mo, aw ang lagda mao nga kadtong sakyanan nga masakpan nga gigamitan og lain nga plate numbers, ipa-impound ra ba g’yod.
* * *
Bitaw, kun ako ang pagbut-on mas pabor ko sa gisugyot ni Tommy nga ang mga private vehicles lang maoy higpitan nga dili paagion sa Banilad-Talamban Highway atul sa “peak hours.”
Mahimo man nga ang mga tag-iya og private vehicles mosayo pag-agi kun gusto nila nga dili sila maabtan sa gidili nga oras.
Ang “peak hours” mao ang gikan sa alas sayes ngadto sa alas nueve sa buntag, alas 11 ngadto ala una sa hapon ug alas kwatro ngadto sa alas utso sa gabii.
Hala, agwanta lang usa ta mga higala, unsaon nga gikinahanglan man usab ang pagtukod sa flyover diha sa Banilad sa pamasin nga makaiban kini sa problema sa kahuot sa mga sakyanan sa maong dapit.
Tan-aw hinoon nako dili kini makasulbad sa problema kun dili makasinati gihapon kita og traffic congestion kay unsaon nga gamay man ang ubang karsada diha sa Banilad.
Apan ang makalagot g’yod mao ang mga drayber nga makapadugang sa problema sa trapiko kay dili motuman sa tukmang lagda. Ang uban bisan og dunay solid yellow line taliwala sa karsada, mo-overtake gihapon ug mosugat sa mga sakyanan.
Klaro kaayo nga wala g’yoy disiplina o kaha abusado lang g’yod ang ubang drayber.
* * *
Tan-aw nako, mao nga mas dagko og benipisyo ang mga kawani nga direktang nagtrabaho sa Court of Appeals ingon man sa Supreme Court kun itandi sa mga nadistino sa Regional ug Municipal Trial Courts kay gamay ra man og kawani ang duha ka higher courts.
Kini maoy rason nga kagahapon misugod sa ilang pagprotesta ang mga kawani sa RTC ug MTCC. Kini pinaagi sa pagsul-ob og itum nga sapot samtang sila nag-duty sa lainlain nilang buhatan.
Apan hinoon, padayon ang serbisyo sa mga court employees. Ang reklamo sa maong mga kawani angay’ng susihon ug tagdon dayon sa Supreme Court. Kun masuta nga angay silang hatagan og susamang benipisyo, angay silang hatagan dayon aron dili makapaluya kanila pagtrabaho.