Wa mahinayon ang labing una untang panag-abot sa publiko sa tanang kandidato pagka mayor ug pagka bise mayor sa Dakbayan sa Mandaue. Ang wa pagtunga nilang Konsehal Jonas Cortes ug Glenn Bercede, mga kandidato pagka mayor ug pagka bise mayor sa Team Honesty, nga pulos nisanong sa among pagdapit ug namalibad gahapon na sa buntag, nakamugna og dakong haw-ang sa Kulokabildo.Com sa DYAB Abante Bisaya ug Sky Cable matag Lunes sa buntag sa Ayala Activity Center. Wa hinuon hingpit nga mapakyas ang kalihokan tungod sa pagtambong sa tulo ka mga kandidato pagka mayor, silang Acting Mayor Ading Seno, Jonkie Ouano sa Power Team 4 ug Atty. Magno Dionson sa Bando Mandaue-Anak Bisaya, sa running mate ni Jonkie nga si Konsehal Carlo Fortuna ug sa pipila ka kandidato pagka konsehal. Nitambong sab ug maisugong nipasidaan sa tanang kandidato nga langkaton nang tanan nilang ilegal nga campaign materials sa mosunod nga pipila ka adlaw ang Mandaue City Election Officer, Atty. Ferdinand Gujilde.
Niulbo ang tensiyon atol sa usa ug tunga ka takna nga tulomanon dihang si Urban Poor Leader Edward Ligas, nga aktibong nangampanya alang ni Cortes, maisugong nangutana ni Jonkie mahitungod sa lapad nga pangilkil sa mga magpapatigayon ug ubang mga pangurakot nga gipasangil batok sa iyang amahan nga si Teddy, sa ilang pagpanag-iya sa mga prangkisa sa Jollibee, sa giingong pagpanghasi sa mga kabos nga Mandauehanon ug ilang politikanhong mga kaatbang ug ubang mga pangabuso sa gahom. Sa iyang kredito, si Jonkie kalma nga nitubag sa mga pasangil batok sa iyang pamilya:
• Wa pa kapamatud-i ang mga pasangil batok sa iyang amahan, sama nga way bisan usa ka dako sa Mandaue nga naggasto sa giingong overprices nga decorative ug street lamps nga gigamit sa 12th Asean Summit; ug
• Ang Jollibee sa Bogo ug Carcar gipanag-iya sa iyang bayaw nga si Jojo Dizon ug kaubanan ug di tinuod nga silay nanag-iya sa Jollibee sa Vietnam ug Singapore.
Ang labing nakapalingaw sa mga nanambong mao si Seno. Kinsa way pupanagana nga niangkon og responsibilidad sa tanang mga programa sa administrasyong Ouano nga napahimuslan sa mga Mandauehanon apan nipahid sa tanang tulobagon sa nabulilyasong mga proyekto ngadto sa nasuspenso nga mayor. Nakaiskor hinuon si Seno dihang nisaad siya nga, lahi ni Jonkie nga nisaad paghimong "world class" sa Mandaue, unahon niya paghaw-as ang kinabag-an sa mga Mandauehanon gikan sa ilang kalisod. Si Dionson sa iyang bahin nagdumili pagdawat sa pasangil nga tungod sa hinog niyang pangedaron (84), nalansang siya sa kagahapon ug di nang katugkad sa bag-ong mga panginahanglan sa mga Mandauehanon. Nipasabot si Dionson nga ang panginahanglan pagbanhaw sa kaligdong ug katarung sa pamunoan sa Mandaue wa moila og panahon ni panuigon.
Email:
leo_lastimosa@abs-cbn.com