Tak-om sa gasto

Karong semanaha, tangkod nang usa ka buwan human sa 12th Asean Summit nga gipahigayon dinhi sa Sugbo. Apan wa pay bisan usa ka ahensiya sa lokal ug nasudnong kagamhanan sa ilang gisaad nga kuwentada giunsa paggasto ang gibanabanang kapin sa P2 bilyones sa buhis sa katawhan nga gipabaha alang sa summit. Hinaot nga magpakabana ug magmatinud-anon nang mga hingtungdan aron matubag ang nagtubo nga pagduda sa mga Sugbuanon nga mas daghan ang nisimang pagpaburot sa pribadong mga bolsa kay sa aktuwal nga nadapat sa mga proyekto. Ang Malakanyang ug si Pres. Arroyo maoy nangu sa ligoy pagpatin-aw ngadto sa mga magbubuhis giunsa paggasto ang daginuton nga bunga sa pagtukaw, paghago ug pagpadusingot sa kinabag-an nga maoy labing kabos nga mga sakop sa katilingban. Ang wa pa pagbayad sa dagkong mga obligasyon sa National Orgnizing Committee (NOC) dinhi sa Sugbo kuyaw nga mao lay pasiunang tilimad-on nga way matinud-anong kuwentada nga umaabot.

* * *

Ang labing maapiki pagpatin-aw sa nagbuntaog nilang gasto mao ang Department of Public Works and Highways (DPWH), labi na tungod sa duha ka labing kontrobersiyal nilang mga proyekto:

• Ang 1,800 ka decorative lampposts nga tag-P95,000 matag usa nga gikutay sa kinatibuk-ang ruta sa summit gikan sa Marco Polo sa Dakbayan sa Sugbo ngadto sa Shangrila Mactan sa Dakbayan sa Lapulapu; ug

• Ang P83 milyones nga balor sa 41 ka surveillance cameras nga hangtod karon wa dawata sa end-user, ang Philippine National Police nga girepresentahan sa duha ka labing tag-as nga mga opisyal sa PRO 7, silang Heneral Silverio Alarcio ug Koronel Lani-O Nerez. Apan si DPWH 7 Director Robert Lala, bisan nag-atubang na og kasong plunder ug ubang mga kasong kriminal, mora lang og wa matandog. Nahilom na sa iyang hudlat sa di pagbayad sa mga kontraktor nga wa kapasiga sa tanang suga hangtod nga nahuman na lang ang summit. Ug nagpapating gihapon pagpangugat nga nakapasar ang cameras bisan gideklarar na nilang Alarcio ug Nerez nga wa katuman sa labing batakan nga mga panginahanglan nga gitakda sa terms of reference (TOR) sa subasta.

* * *

Mingaw pa sab sa tirana ang lokal nga mga opisyal sa Sugbo sa ilang pasalig paghatag og kuwentada giunsa pagasto ang minilyon ka pesos gikan sa lokal ug nasudnong panudlanan:

• Ang mga mayor sa mga dakbayan sa Sugbo, Mandaue ug Lapulapu angayng mopatin-aw na sa minilyon ka pesos nga nagasto sa Kadaogan sa Mactan ug Laag-Laag Sugbo nga giisnab sa kasagaran sa mga kapikas sa head of state (tulo ra sa 16 ang nipakita) ug ang mas dagko nilang gasto sa pagpangaspalto, pagpanuga ug pagpabuwak sa kadalanan; ug

• Si Gobernador Gwen Garcia angayng mopasabot na sa mga Sugbuanon pilay gasto sa CICC ug kon nakapasar ba sa batakang panginahanglan sa subasta ang nahilambigit nga mga transaksiyon.

* * *

Email:leo_lastimosa@abs-cbn.com