Atraso ni Oliva

Unsa ang values (mithi) nga makat-onan sa mga tinun-an gikan sa Life in the Spirit Seminar (LSS) sa Oasis of Love human nangreklamo ang 20 ka babayeng tinun-an sa Abellana National School (ANS) nga gihikap ang pribadong bahin sa ilang lawas sa usa sa pito ka pari nga nagpakumpisal sa gibanabanang 600 ka tinun-an sa tibuok hapon niadtong Nobyembre 14:

• Kamapahimuslanon sa gipasanginlang pari ug sa mga tigpasiugda nga nakapatuyang pagpangolekta gikan sa mga tinun-an ug mga magtutudlo nga napugos pagtambong kay ilang labaw ang haligi sa Oasis?;

• Pagtabon ug paglihay-lihay sa kadagkoan sa Oasis?; ug

• Ilang ka-iresponsable kay wa diay ilha ni susiha ang kaligdong sa mga pari nga ilang gisuholan pagduma sa pagpangumpisal?

* * *

Pito ka adlaw human sa insidente, ug wa man tingali lalis nga kon tinuod nga gipanamastamasan ang mga bata sa pari mas seryuso ni kay sa kasarangan nga pagpanagmal sa classroom, ang mga tagduma sa kontrobersiyal nga LSS sa Abellana mora lang og wa mag-apura. Hangtod karon wa pa silang kaila kinsa ang pari nga gipasanginlang nagbinastos sa mga tinun-an. Ang kadagkoan sa ANS nitumbok sa Oasis of Love nga maoy nangimbitar sa pari. Apan ang Oasis nipasabot sab nga ang kadagkoan sa artsidyosesis maoy nidestino ug nakaila sa pari.

Nakakuha kog kasayuran nga makapatumaw sa pagduda nga malisyusong gitagoan sa Oasis of Love ang ngan sa pari aron pagsabotahe sa imbestigasyon sa eskandalo: Ang principal sa ANS, si Ernesto Jacel, niingon nga dihang nagsugod nag reklamo ang mga bata ila dayong gisumbong batok sa kadagkoan sa Oasis ang gihimo sa pari samtang nagpadayon pang pangumpisal. Inay ilhon ug badlungon dayon ang pari, ang "elder" sa Oasis igo rang ni-am-am nilang Jacel nga tingalig "namarayeg" rang pari.

* * *

Ambot unsay papel ni DepEd 7 Regional Director Carolino Mordeno sa pagtugot nilang Cebu City Schools Division Superintendent Leonilo Oliva ug ubang kadagkoan sa Oasis pagpasiugda og LSS sa public schools, apan na-syut sila sa lawom nga gahong tungod ning maong eskandalo:

• Wa silang kapanalipod sa mga bata nga gitugyan sa mga ginikanan ubos sa ilang pag-atiman;

• Kon mosunod ang ubang relihiyon hingpit nang mabalda ang pag-eskuyla sa mga tinun-an; ug

• Kon balibaran, kapasanginlan silang nipabor sa Oasis.

* * *

Labaw sa tanan, angayng imbestigahon si Oliva:

• Nganong gitugotan man niyang duha ka adlaw nga LSS atol sa mga oras nga tingklase sa ANS ug ubang eskuylahan?;

• Makahatag ba siyag kuwentada giunsa pagasto ang kaliboan na ka pesos nga pinugos nilang koleksiyon sa gipaapil nga mga tinun-an ug mga magtutudlo?; ug

• Tinuod bang iyang asawa maoy nangimbitar sa gipasanginlang pari ug iya rang kapamilya ang nagduma sa giingong pinaburot nga catering sa tanang LSS?

* * *

Email: leo_lastimosa@abs-cbn.com