Wala na kinahanglana kining maong mga dispatchers kay ang mga pasahero makamao man nga mobasa kon unsa nga sakyanan ang ilang sakyan paingon sa ilang destinasyon.
Klaro nga pagkasulti, mga tong collectors kining maong mga tawo nga nagtakoban isip mga dispatchers og dili angay'ng hatagan og sensiyo kay makapadasig kini sa uban ug makaiban kini'g daku sa inyong kita.
Duha ka text messages nga akong nadawat nga nagreklamo kabahin sa mga dispatchers. Ilang gihulagway nga gidaug-daug sila sa maong mga tawo.
Ang akong ikasulti kaninyo, walay modaug-daug kon walay magpadaug-daug. Apan kon maoy mopasuwabi kaninyo ang kunohay isog apan talawan, walay kasulbaran sa inyong problema.
Sama sa usa ka drayber nga nagpanawan sa rota Highway Mandaue ug Liloan, nagreklamo tungod kay ang mga polis sa Mandaue maghinan-aw lang nga kolektahan sila sa mga dispatchers.
Mora man god og walay ordinansa ang Mandaue nga nagdili sa dispatching. Diri gani sa dakbayan sa Sugbo nga dunay ordinansa kabahin ana, magsiga ra man gihapon ang mata sa mga polis.
Sukol ra god mo nianang mga dispatcher, ayaw mo kahadlok. Usa ka drayber mitug-an nako nga dihang mihatag siya og P2, nasuko ang dispatcher og giingnan siya nga dunggabon.
Misiaw ang mga dispatchers kay kamong mga drayber mohatag man sab. Kon maghugpong kamo pagsukol kanila, sigurado ko nga hingpit nga moundang na ang maong mga tawo pagpangilkil.
Unsaon man god, kon dakpon sa mga polis kining maong mga tong collectors nga nagtakoban isip mga dispatchers, wala may drayber nga motestigos nga sila gikilkilan.
Nagpasabot kini nga dili molampos ang kapolisan pagpasilot sa maong mga tong collectors kon walay pagsuporta sa mga biktima, nga mao kamong mga drayber.
Karon, pangutan-on ko kamo, angay ba ninyo nga ipadayon ang inyong pagkatalawan?
Awhag nako kaninyong mga drayber, putla ang inyong pagkatalawan ug hunonga ang pagka abosado nga dili motahud sa lagda alang sa tukmang pagmaneho.
Daghan na hinuon karon ang nagpaabot nga motan-aw sa interview ni Wesy Quisumbing nga gi-record sa ABS-CBN apan napugngan ang pagpasalida tungod sa mando sa hukmanan.
Ang abogado ni Wesy nga si Atty. Paris Real nagtoo hinoon nga wala gayo'y katungod ang Regional Trial Court sa Sugbo pagpugong pagpasalida sa maong interview kay tua man sa Manila ang ABS-CBN.
Aw kinahanglang kombinsihon ni Atty. Real ang hukmanan aron bakwion ang giisyu nga temporary restraining order sa pagpasalida sa maong interview.
Gitangtang si Wesy sa pagka presidente ug chief executive officer sa ilang korporasyon kay nasuko kaayo ang iyang amahan human siya magpa-sex transplant.
Ang uban miingon nga dili g'yod unta kadto angay'ng himoon ni Mr. Quisumbing kay bisan unsa pa ang iyang anak - magpabilin kini nga iya g'yong anak nga angay'ng panggaon.
Gihimo nilang basihanan si Mrs. Margarita Larrañaga, kang kansang anak nga si Paco naapil nga nakonbikto sa giingong pagpanglugos, bisan unsa na lang ang gihimo para maluwas ang iyang anak gikan sa silot nga kamatayon.
Si senador Freddie Webb wala na makadaug sa eleksyon tungod sa grabe niyang pagdepensa sa iyang anak nga si Hubert, kinsa nakonbikto usab sa pagpanglugos.
Ilang gihulagway nga si Mr. Quisumbing dili unta angay'ng mohimo sa pagsalikway sa iyang anak ilabi na nga gipasidunggan siya sa usa ka unibersidad og Doctorate of Humanities.
Mas ikalipay nako kon duna kamo'y direct line nga ibutang ingon man itug-an ninyo ang matuod ninyong ngalan.
Kon sa akong pag-verify sa inyong inpormasyon dili kamo motubag, posible nga dili nako tagdon ang inyong reklamo.