Kontes sa bakak

Sa di pa makabuylo ang mga torotot sa Malakanyang pagkondenar sa oposisyon nga ilang gipasanginlan nga nagtukod og "witness academy" pinaagi sa pagpresentar og peke nga mga saksi, angayng pahinumdoman ang Palasyo nga silay labing napaso sa way kukaikog nga pagpakita og mga saksi nga klarong gitumong sa paglubog sa kamatuoran.

Tuguting maghisgot lang kog duha sa labing kuwestiyonable nilang mga saksi:

l Ang chief of staff ni Kongresista Ignacio Arroyo nga maoy unang gipresentar isip "Gary," ang lalaking kaistorya ni Presidente Gloria Macapagal-Arroyo sa Garci tapes pero ang presidente mismo ang niangkon sa bakak kay giangkon man nga opisyal sa Comelec ang iyang kaistorya ug si kanhi Comelec Commissioner Virgilio Garcillano niangkon nga siya ang kaistorya sa presidente; ug

l Ang lalaking niangkon nga gilugos siyang Arsobispo Oscar Cruz, pero wa na ipakita sa Palasyo ang pekeng saksi kay nisamot na man hinuon ang kaligdong ug kalig-on sa kampanya ni Cruz batok sa jueteng.

* * *

Mahimong nilampos ang Malakanyang paglawgaw sa kontrobersiya tungod sa nagkalata nilang mga saksi nga gitugbang sa kada bag-ong saksi ug pasangil batok sa presidente. Pero ang katawhan dili bugo ni buang. Lumalabay rang ilang kalibog. Dili sila hangtod sa hangtod nga malubong ni Presidente Arroyo sa kangitngit.

Sama nga ang kamatuoran di mahimong hangtod sa hangtod nga malubong sa lang-og nga lunangan sa pagpangulipas. Bisan sa higanteng makinarya sa propaganda nga gipalihok sa presidente ginamit ang minilyon ka pesos nga pondo sa nasudnong panudlanan, ug bisan unsa kadudahan ug katibuwaag ang liderato sa politikanhong oposisyon nga maoy niduso sa nagkayamukat nga kampanya pagpalagpot ni Presidente Arroyo sa katungdanan, moabot rang adlaw nga ang Haring Lungsod motimbakuwas.

Ug mopalayas sa presidente nga way lehitimong mandato.

* * *

Ang makalibog nga baruganan ni House Speaker Jose de Venecia nga usa ka adlaw nideklarar nga patay nang impeachment complaint batok sa presidente, pero pagka sunod adlaw nibakwi nga dako diay ning buhi, di monopoliya sa liderato sa Kongreso. Samang kalibog ang nagbukot sa tibuok administrasyon:

l Kon ilang ibasura ang impeachment complaint pinaagi sa pagsuburno sa mayoriya sa mga kongresista ug pagluok sa tanang ipresentar nga mga saksi ug mga ebidensiya, peligrong moalsa ang katawhan nga nagpaabot sa presidente nga manalipod sa iyang kaugalingon pinaagi sa impeachment trial; pero

l Kon ilang tugotan nga masumiter ang articles of impeachment ngadto sa Senado, peligrong makatsamba ang oposisyon pagpresentar og laing "Chavit Singson" o "Clarissa Ocampo" o mga ebidensiya nga mas makabungog pa kay sa "second envelope" nga maoy kataposang lanot nga nakapabugto sa pailob ug pagpangiyugpos sa kinabag-an sa katawhan atubangan sa makauuwawng mga bisyo ug lapad nga pangurakot sa administrasyon ni kanhi presidente Joseph Estrada niadtong 2001.

* * *

Email: leo_lastimosa@abs-cbn.com