Komadrona, 3 pa tiklo sa abortion sa Caloocan
![Komadrona, 3 pa tiklo sa abortion sa Caloocan](https://media.philstar.com/photos/2024/07/16/4_2024-07-16_21-41-16.jpg)
MANILA, Philippines — Arestado ng mga tauhan ng Northern Police District Anti-Cyber Crime Unit ang isang komadrona at tatlo pang kasamahan nito na nahuli sa aktong nagsasagawa ng abortion sa Caloocan City.
Hindi umubra ang tahol ng mga aso upang pasukin ng mga awtoridad ang isang paupahang bahay at huli sa akto ang isinasagawang abortion sa isang pasyente.
Ayon kay Capt. Santiago Roy, team leader ng Anti Cyber Crime team ng Northern Police District nakatanggap sila ng impormasyon na may nag-aalok na serbisyo online ng abortion.
Kanila itong beneripika hanggang sa ikasa ang operasyon at isang pulis ang nagpanggap na mag-papa-abort.
Sa usapan sa messenger ipinaliwanag ng komadrona ang proseso ng abortion at tiniyak na malinis ang kanilang mga gagamiting aparatus at legal ang gamot.
Dagdag pa ng komadrona, hindi sila scammer kaya walang dapat na ikatakot.
Umaabot sa P16,000 hanggang P20,000 ang bayad ng abortion na kadalasang ang kliyente ay mga estudyante.
Inamin naman ng komadrona na siya mismo ang gumagawa ng abortion dahil na rin sa pagnanais nitong makatulong.
Isang buntis ang inabutan sa kama na tinurukan na ng pampalaglag at hinihintay na lamang na humilab ang tiyan. Dinala na siya sa ospital matapos masagip.
Nahaharap sa kasong medical malpractice act at pharmacy law ang komadrona habang inihahahda rin ang kaso laban sa 3 iba pa.
- Latest