200 ka artesian wells sa Cebu City ipaayo

CEBU, Philippines — Nag-andam ang Dakbayan sa Sugbo og nagkadaiyang lakang aron mamenosan ang epekto sa grabeng El Niño lakip ang pagpaayo sa 200 ka artesian wells ug paghangyo sa Metropolitan Cebu Water District (MCWD) nga modugang og 10 million liters per day (MLD) nga suplay sa tubig.

Matud ni Cebu City Mayor Nestor Archival nga giila na sa siyudad ang 600 ka artesian wells nga mahimong alternatibong tinubdan sa tubig kon adunay pagkaputol sa suplay.

Matud ni Archival nga 400 niini ang magamit pa samtang ang nahibiling 200 nagkinahangla’ng ayohon. Si Archival kinsa nikuyog kang Senador Bong Go atol sa pagbisita niini sa siyudad kagahapon nipadayag nga gihangyo usab niya ang MCWD nga modugang og labing menos 10 MLD nga suplay sa tubig kada adlaw ilabi na sa mga condominium aron makatabang sa pagsuplay sa tubig panahon sa taas nga huwaw.

Gitan-aw usab sa siyudad ang posibilidad nga makigsabot sa mga supplier aron mamenosan og 30 porsiyento ang presyo sa tubig nga ilang gipalit nga sa pagkakaron anaa sa P62 matag cubic meter aron makontrolar ang dugang nga gasto. Laing lakang ang pagtukod og mga siphon system sa kabukiran sa amihanan ug habagatang bahin sa siyudad. Mogamit kini og mga tubo ug pasilidad sa pagsala aron makolekta ug maproseso ang tubig nga mahimong mainom.

Gibutyag ni Archival nga wala pa makalain og lahi nga calamity fund ang siyudad alang sa pagpangandam sa El Niño ug gamiton una ang kasamtangang regular nga budget.

 Giawhag usab niya ang mga residente nga magmatngon sa paggamit sa tubig ug likayan ang pag-usik niini samtang nangandam ang siyudad sa posibleng kakulangon sa suplay sa tubig. (BANAT NEWS)