Wildcats mibihag sa Lancers

CEBU, Philippines — Ang Cebu Institute of Technology-University (CIT-U) Wildcats mipakugang sa four-time defending champions University of the Visayas (UV) Green Lancers, 79-64, sa Cebu Schools Athletic Foundation, Inc. (CESAFI) Season 26 basketball tournament niadtong Domingo, Oktubre 25, sa University of San Carlos (USC)-Downtown Campus Gymnasium.

Tam-is nga panimalos ang nakab-ot sa Wildcats, nga gikastigo sa inilog nga Lancers, 85–63, sa unang hugna nilang engkwentro niadtong Oktubre 4 sa Cebu Coliseum.

Si Garryl Dave Layaguin mikadlit og 19 puntos uban ang pito ka rebounds, usa ka assist, duha ka steals ug usa block, samtang si John Eimrod Rodulfa mipupo og 16 puntos, duha ka assists ug tulo alang sa Wildcats, nga miduyog sa USC Warriors sa ikatulong puwesto sa college division standings uban ang managsamang 6-4 win-loss rekords.

Midugang si Jeshram Baliwan og 11 puntos ug siyam ka rebounds, samtang si Axyl James Casas miamot og 10 puntos, upat ka rebounds ug duha ka assists alang sa Wildcats, nga milamaso sa Lancers sa katapusang kuwarter, 24-12, nga miresulta ngadto sa 15 puntos nga demolisyon.

Si Kent Ivo Salarda miposte og double-double nga 21 puntos ug 11 ka rebounds, samtang si Winston Bingil mitimbre og 13 puntos apan nakawang ilang paningkamot kay ang Lancers natagak sa 7-3.

Sa laing collegiate matchup, sila si Dan Mitchell Ferraren ug Revo Lao mi-iskor og 13 puntos matag sa dihang gibuntog sa University of Cebu Lapu-Lapu and Mandaue (UCLM) Webmasters ang University of Southern Philippines Foundation (USPF) Panthers, 61-59, alang sa ikatulo pa lamang nila nga daog sa 10 ka duwa.

Sa aksyon sa high school, si  Zane Oddyssie Ondoy mipabuto og 24 puntos uban ang unom ka rebounds, samtang si Antonio Joseph Issifu mibirada og 15 puntos, upat ka rebounds ug tulo ka steals sa dihang gipayaka sa Don Bosco Technical College (DBTC) Greywolves ang Benedicto College (BC) Baby Cheetahs, 77-67, alang sa una nilang daog.

Si Zhen Francis Ancheta miharos og 13 puntos, lima ka rebounds, pito ka assists ug walo ka steals aron tabangan ang Greywolves pagpakgang sa unom ka sagunson nilang pildi.

Si Jhun Miguel Telmo mipatuasik og 20 puntos ug walo ka rebounds sa dihan gidominar sa University of San Jose-Recoletos (USJ-R) Jaguar Cubs ang San Carlos School of Cebu (SCSC) Baby Warriors, 100-71.

Midonar si Pipa Cababahay og 14 puntos, tulo ka rebounds, tulo ka assists ug upat ka steals, samtang si Ardan Cyrus Navarro mikimada og 11 puntos, upat ka assists ug tulo ka steals sa dihang giinat sa Jaguar Cubs ang ilang baraha ngadto sa 6-2.

Sa laing resulta, si Kirbey Borbon mipabuhagay og 27 puntos ug siyam ka rebounds sa dihang gilampornas sa UV Baby Lancers ang PAREF Springdale School Titans, 86-59.

Sila si Rhadz Simon Silawan ug Jancy Llyco Ventura parehong mitali og 14 puntos alang sa Baby Lancers, nga nagtangag na karon og 3-4 rekord.