Articles I, III ug IV sa impeachment gi-withdraw sa prosekusyon

CEBU, Philippines — Sa usa ka wala damhang panghitabo, gi-withdraw kagahapong adlawa sa House prosecutors, Oktobre 13, ang tulo sa upat ka impeachment charges batok ni Vice President Sara Duterte, apil ang misuse of confidential funds  ug ang giingong grave threats niya sa kinabuhi sa Presidente, First Lady ug kanhi House Speaker.

Ang Senate impeachment court, pinaagi ni presiding officer Sen. Chiz Escudero nidawat ug gitugotan ang withdrawal of Articles I, III ug IV, mao nga usa nalang ka article of impeachment ang husayon batok kang Duterte nga mao ang unexplained wealth (Article II).

Wala na padayuna sa Prosecutors ang pagpresentar sa Article III (bribery) kay gi-withdraw sad nila ang kaso.

“Today, the prosecution respectfully manifests that it will no longer pursue three of them,” matud pang lead prosecutor Rep. Jinky Luistro sa impeachment court. “It will stand on one, and that is article two on unexplained wealth.” 

Nagpasabot kini nga dili na kinahanglang mobotar ang mga senator judges bahin aning tulo nga gi-withdraw. Mahimo nalang nga kombiktohon o dili si Duterte pinaagi sa Article II o unexplained wealth nga gituohan sa prosekusyon nga paigo na para siya matangtang sa gahum.

Ang init kaayong isyu bahin sa misuse sa P612 milyones sa confidential funds, ang paghulga sa kinabuhi sa presidente ug ang bribery niini sa mga opisyales sa DepEd.

Kaning gipabilin nilang Article II naglangkub sa unexplained wealth, violations niya sa SALN, ug ang  unlawful business interests.

Matud pang Luistro tutokan nalang kining usa ka article of impeachment kay mao ni ang “the most judicious course”  para dili na mausik pa ang panahon sa impeachment court pagtimbang-timbang sa mga ebidensiya ug mga pagbabag sa tanang mgau upat ka kaso.

Matud pang Luistro, nakita na niya ang kasagmuyo sa publiko sukad nga gisugdan kining impeachment batok kang VP Duterte atong 2024 ug epekto niini nga nakapalangay sa Senate hearings sa 2027 national budget.

Dugang pang Luistro, ang upat ka articles of impeachment pulos tanan lig-on ug bug-at batok kang VP Duterte, maong dako iyang pagsalig nga bisan ang usa lang ang ipabilin, makombikto gihapon ang bise presidente.

 “Having elected to withdraw the articles after resting its case, the prosecution must therefore accept the legal consequences of that withdrawal,” tubag ni Escudero sa prosekusyon.

Gilibkas na sad sa korte ang restriksyon bahin sa paghatag og mga pamahayag ubos sa Rule 18 o sub judice rule sa Articles I, III ug IV.

Apan ang depensa ni VP Duterte pinangulohan sa ilang lead counsel nga si Sheila Sison, kusganong nisupak sa withdrawal kay gilimitahan nalang daw sila pagtingog batok sa usa ka kaso, pero gilibkas ang Rule 18 sa gi-withdraw nga articles.

"The reason behind the relaxing of Rule 18 was more to afford the respondent to respond in the manner she may deem fit both in this courtroom, subject to the objections and ruling of the court, and outside," mao nay tubag ni Escudero.

Tungod sa withdrawal sa tulo ka articles of impeachmen, gimandoan ang prosekusyon pagduso sa ilang formal offer of evidence niini sulod sa napulo ka adlaw sugod kagahapong adlawa hangtud Oktobre 23.

Ang depensa patubagon sad sulod sa napulo ka adlaw human napresentar ang mga ebidensiya ug pasangil.

Tungod sad niini, gipaabot nga mas paspas na ang pagdungog ug resolusyon kun kombiktohon o dili si VP Duterte.

Apan walo ka adlaw nga dili makatuki sa kaso ang Senado karong bulana tungod sa budget hearings, sa ASEAN-related break and holidays.— IBM BANAT NEWS