Cebu City mopatuman sa flexible work arrangement

CEBU, Philippines — Ipatuman sa kagamhanan sa Dakbayan sa Sugbo ang flexible work arrangement o Compressed Workweek (CWW) alang sa tanang opisyal ug kawani sa siyudad sugod kagahapon, Septiyembre 21, 2026.

Niluwat og Memorandum No. HR-2026-095 ang Human Resource Development Office (HRDO) nga naglatid sa pagpatuman sa Executive Order No. 113 nga luwatan pa ni Mayor Nestor Archival, Sr..

Tumong niini nga mahatagan og solusyon ang rotational brownout nga nakatugaw sa serbisyo sa gobiyerno lakip na ang padayon nga pagsaka sa presyo sa krudo ug pletehan.

Pinaagi sa pagkunhod sa inadlaw-adlaw nga pagbiyahe sa mga kawani gilaoman nga madaginot ang kagamhanan sa kuryente ug uban pa’ng operational expenses hinungdan nga ipatuman ang 40 ka oras sulod sa upat ka adlaw nga trabaho matag semana.

Ang mga kawani motrabaho gikan sa Lunes hangtud sa Huwebes sa alas 8:00 sa buntag hangtud sa alas 7:00 gabii diin 10 ka oras matag adlaw walay apil ang 1 ka oras nga tingpaniudto.

Ang dugang nga oras sa adlaw-adlaw nga schedule tungod CWW dili isipon nga overtime.

Kon matunong sa holiday o suspension ang usa ka adlaw sa CWW mobalik sa regular nga 8:00 hour workday ang schedule sa maong semana.

Ang HRDO nipahibalo nga ang tanang naaprobahan nga leave ug flexible work arrangements sugod sa Septiyembre 21, 2026 otomatiko nga mabawi (revoked) aron matunong sa bag-ong ihap sa oras ubos sa CWW.

Walay labot sa CWW ang mga opisina nga naghatag og direktang serbisyo sama sa City Health Department (CHD) ug tanang health center, Cebu City Medical Center (CCMC) ug Guba Community Hospital, Cebu City Disaster and Risk Reduction Management Office (CCRRMO), Department of Social Welfare Services (DSWS), Department of Veterinary Medicine and Fisheries (DVMF), Department of Public Services (DPS) Office of the City Markets, Department of General Services - ERMM and BMS, Office of the Mayor - BPLO, CHAMP, CSU, Fort San Pedro, Bantay-Dagat and Protocol, Office of the Mayor- PIO, POP, PROBE, Cebu City Environment and Natural Resources Office (CCENRO), Cebu City Transportation Office (CCTO), CCMC-College of Nursing, ug Department of Engineering and Public Works (DEPW) walay apil ang admin/office personnel. Ang maong mga buhatan pabilin sa ilang regular schedule.

Giawhag usab sa HRDO ug DGS ang matag departamento sa pag-monitor sa pagdaginot sa kuryente, paggamit sa gasolina ug sa kasigurohan nga walay langan sa paghatag og serbisyo sa publiko. (BANAT NEWS)