Mandaue modugang og vacuum trucks alang sa drainage clearing

CEBU, Philippines — Duha ka vacuum trucks ang idugang sa Dakbayan sa Mandaue aron mapalapdan ang drainage-clearing operations ngadto sa mga interior area nga dili maabot sa kasamtangang 10-wheeler vacuum trucks sa siyudad.

Gidesinyo ang gagmay nga vacuum trucks aron makasulod sa mga huot nga barangay roads ug eskinita diin mahimong limpiyohan ang lapok, debris ug mga sagbot nga natigom sa gagmay nga drainage systems ug waterways.

Matud ni Mandaue City Mayor Thadeo Jovito “Jonkie” Ouano nga ang dugang nga equipment kabahin sa paningkamot sa siyudad nga palig-onon ang declogging ug cleaning operations ilabina sa pag-andam sa mga panahon nga kusog ang ulan.

Samtang si Engineer Louie Rey Biton sa City Engineering Office nagkanayon nga ang gagmay nga units makatabang sa mga personnel nga maka-access sa drainage systems nga nahimutang sa mga hiktin nga dalan ug eskinita.

Gamiton ang mga truck sa pagtangtang sa natigom nga lapok, basura ug vegetation gikan sa drainage systems ug mga creek nga dili maabot sa mas dagkong vacuum trucks.

“Bisan pa’g init pa kaayo, sige-sige sad ni sila’g tuyok sa mga kabaranggayan. Dako sad ni’g tabang ilabi na sa interior portions nga dili masudlan sa atong 10-wheeler nga vacuum truck”, padayag ni Ouano. Pormal nga giturn-over sa city government ang duha ka vacuum trucks niadtong Septiyembre 14, 2026.

Idugang kini sa mga equipment nga gigamit sa City Engineer’s Office alang sa flood-mitigation ug drainage-clearing operations.

Gibutyag ni Ouano nga padayon ang pag-inspection ug paglimpiyo sa drainage systems sa nagkadaiyang barangay isip pagpangandam sa mga panahon nga mobunok ang ulan.

Gipaabot usab sa siyudad ang duha ka mobile pump trucks nga gamiton sa pagtangtang sa natigom nga tubig atol sa pagbaha. Si Ouano nagkanayon nga naghulat pa ang duha ka vacuum trucks sa ilang official registration una kini hingpit nga ma-deploy sa field.

Gilaoman nga ang dugang nga equipment makatabang sa pagpalig-on sa flood-mitigation efforts sa siyudad ilabina sa mga lugar nga lisod ma-access sa dagkong equipment.  BDB BANAT NEWS