Carrion kumpiyansa sa gymnastics team

MANILA, Philippines — Naniniwala si Gymnastics Association of the Philippines president Cynthia Carrion na makukuha ng bansa ang kauna-una­hang Asian Games gold medal sa Aichi-Nagoya, Japan.

Ito ay dahil na rin sa pagbandera sa national gymnastics team ni 2024 Paris Olympic Games double-gold medalist Carlos Yulo.

Bokya pa ang Pinas sa gold medal sa gymnastics event ng quadrennial meet.

Kumpiyansa si Carrion na makakakuha sila ng tatlong ginto sa men’s artistic gymnastics at isa sa women’s artistic gymnastis.

Nanalo na rin ng ginto si Yulo sa World, Asian Championships at Southeast Asian Games.

Ngunit wala pang gold medal ang 26-anyos na top gymnast sa Asiad.

Magbubukas ang artistic gymnastics competition sa Setyembre 21 hanggang 25 sa Rainbow Hall ng Nippon Gaishi Hall.

Bukod kay Yulo, posible ring kumuha ng ginto ang kanyang utol na si Eldrew.

Ito ang Asiad debut ng 18-anyos na si Eldrew.

Samantala, si Paris Olympian Levi Ruvivar ang babandera sa wo­men’s team kasama si Asian Championship veteran Kylee Kvamme.

Kasama rin sa 14-man squad sina Juancho Miguel Besana, Justine Ace de Leon, Zachary Cortins Nuñez, Chiara Dawn Andrew, Lauren Supnet at Haylee Garcia sa artistic gymnastics at sina Breanna Labadan at Jasmine Althea Romulo sa rhythmic.

Kakampanya sina Jerry Ilano Jr. at Luvicar Janine Padilla sa trampoline.

Nakatakda ang trampoline sa Setyembre 27, habang ang rhythmic event ay sa Oktubre 1 hanggang 3.