EST Cola unang hahamon sa PLDT

MANILA, Philippines — Babanderahan ni Fil-Canadian Savi Davison ang title defense ng PLDT sa pagsagupa sa guest team EST Cola ng Thailand sa pagbubukas ngayon ng 2026 Premier Volleyball League (PVL)  Invitational Conference.

Lalabanan ng High Speed Hitters ang Thai squad sa ala-1:30 ng hapon kasunod ang banggaan ng Creamline Cool Smashers at Nxled Chameleons sa alas-4 ng hapon sa Smart Araneta Coliseum.

Sa huling laro sa alas-6:30 ng gabi magkikita ang Farm Fresh Foxies at guest team Ho Chi Minh City ng Vietnam.

Bukod kay Davison, aasahan din ng PLDT sina Kim Kianna Dy, Majoy Baron, Mika Reyes, Alleiah Malaluan, Seth Rodriguez, Kim Fajardo, Kath Arado at bagong hugot na si Leila Cruz.

Sina Papatchaya Phontham, Nannaphat Moonjakham, Waruni Kanram, Jiratcha Naoprachum at Nichakorn Wansuk ang isasalang ng EST Cola, binubuo ng Thailand under-20 national team, na tumapos sa fourth place sa una nilang PVL Invitationals stint noong 2024.

Winalis ng High Speed Hitters ang dalawa nilang laro sa nakaraang 2026 PVL On Tour bilang paghahanda sa PVL Invitationals.

Magkasunod na tinalo ng PLDT ang Choco Mucho, 25-21, 20-25, 29-27, 25-18, sa Vigan City, Ilocos Sur at ang Akari, 25-14, 26-24, 21-25, 25-10, sa Tubod, Lanao del Norte.

Determinado ang High Speed Hitters na maka-bangon mula sa third place finish sa nakaraang All-Filipino Conference na pinagreynahan ng Cool Smashers kontra sa Cignal HD Spikers.

Matapos ang EST Cola ay lalabanan ng PLDT ang Nxled bukas ng ala-1:30 ng hapon kasunod ang Ho Chi Minh sa Huwebes sa alas-4 ng hapon.

Magtatapos ang torneo sa Setyembre 8.