EDITORYAL — Transparent bags sa mga bata?

Tungod sa mga bayolenteng mga panghitabo sa sulod sa pipila ka mga eskuylahan dinhi sa nasud sa nakalabay nga mga bulan ning tuiga, gipahugtan na sa DepEd ang mga seguridad sa tanang mga eskuylahan sa tinguhang dili na kini masubli pa.

Naay gisugyot karon ang DepEd nga pagamiton og transparent bags ang mga bata para daw masa sayon para sa mga magbalantay sa mga eskuylahan ang pagtan-aw sa kung unsay mga sulod sa bag o kung unsay gidala sa mga bata.

Mas mapadali aning paagiha ang inspeksyon, pero praktikal ba kaha ni? Una sa tanan, wala pay baligyang transparent bags nga lig-on nga kayang makadala sa tanang mga libro ug mga gamit sa mga bata.

Kung transparent bag, nagpasabot nga ginama kini sa plastic material.  Kung magsige og kagisi sa inadlaw-adlaw nga paggamit sa mga bata nga pirmeng nagdala og daghang mga libro, dako kaayo og gastos ang mga ginikanan.

Ikatulo, murag masupak ani ang gipangtudlo ngadto sa mga bata bahin anang paggamit og plastic tungod sa polusyong dala ani.

Gawas pa niana, kung transparent bag ang ipagamit sa mga bata, pabor kaayo para sa mga kawatan o tulisan nga biktimahon ang mga bata. Permanente silang mabutang sa risgo sa dayun palang nilang pag-adto sa ilang mga eskuylahan.

Hinumdoman unta sa mga taga DepEd nga naay mga bata dunay dalang mga gadgets nga gamit kaayo sa ilang pagtuon.

Kini sama sa cellphones, laptops ug tablets. Asa man na nila ipamutang?

Lain-laing mga pamaagi ang gihimo sa nagkadaiyang mga eskuylahan aron palig-unon ang proteksyon sa mga tinun-an ug mga magtutudlo.

Gani naa untay himuong nationalwide active shooting drill ning semanaha sa tanang mga tunghaan, apan wala gipadayung subay sa tambag sa mga eksperto sa sikolohiya sa mga bata.

 Nganong dili nalang moinstalar og saktong metal detectors sa mga ganghaan sa matag eskuylahan ug estriktohon ang pisikal nga inspeksyon?