3 Vietnamese gidakop

CEBU, Philippines — Tulo ka Vietnamese nationals ang gidakop sa usa ka entrapment operation sa usa ka dental clinic nga nahimutang sa City Time Square, Barangay Tipolo, Mandaue City, niadtong Lunes sa hapon, Agosto 10, 2026.

Ang mga nadakpan giila nga sila Phan Ngan Giang, 30; Ab Do Ro Man, 30; ug Pham Xuan Nghiep, 43, pulos mga Vietnamese nationals.

Ang operasyon gipangulohan sa mga operatiba sa CIDG Mandaue City Field Unit, RFU7 CIDG ug RSOT RFU7 CIDG, uban sa NBI CEBDO Mandaue City ug Police Station 2 sa Mandaue City Police Office, sa koordinasyon sa Philippine Dental Association (PDA) Mandaue Chapter.

Sumala sa report, nakadawat ang mga otoridad og impormasyon ug pormal nga reklamo kalabot sa giingong ilegal nga pagpraktis sa dentistry sa mga suspek.

Sa entrapment operation, usa ka police operative ang nagpakaaron –ingnong pasyente ug misulod sa maong dental clinic ug nagpaibot gyud og ngipon.

 Usa sa mga suspek nga nagpaila nga dentista ang niibot sa iyang usa ka ngipon niini. Pagkahuman ana, gidakop sila sa mga operatiba tungod sa giingong paglapas sa Section 33(a) sa Republic Act 9484 o Philippine Dental Act of 2007.

Nakuha sa operasyon ang nagkalain-laing dental instruments ug materyales, lakip ang dental forceps, cotton plier, mouth mirror, dental syringe nga adunay lidocaine, dental elevator, topical lidocaine spray, gloves, client order form ug dental clinic invoice.

Apil usab sa mga nakuha ang usa ka ngipon sa poseur-patient ug usa ka medicine box nga adunay nagkalain-laing kapsula.

Ang mga suspek pasakaan og kaso ngadto sa Office of the City Prosecutor. (BANAT NEWS)