Nag-vandal sa Mandaue nitahan

CEBU, Philippines — Nasakpan na ang usa ka 25-anyos nga lalaki nga giingong responsable sa pag-vandal og “SEEK” gamit ang spray paint sa mga kural ug bungbong sa nagkadaiyang lugar sa Dakbayan sa Mandaue.

Ang lalaki nga giila sa alyas nga “Roger,” dili tinuod niyang ngalan, taga-Purok Ampalaya, Barangay Cambaro.

Sumala sa Mandaue City Government, usa ka impormante ang mitabang sa pag-ila kang Roger nga giingong responsable sa mga vandalism nga markang “SEEK.”

Boluntaryong miadto si Roger sa opisina ni Mandaue Mayor Thadeo “Jonkie” Ouano aron mangayo og pasaylo sa iyang nahimo ug misaad nga iyang limpyohan ang mga lugar nga iyang giingong gibandalan.

Gihatagan siya ni Ouano og tulo ka adlaw aron limpyohan ug tangtangon ang mga vandal sa mga lugar nga naapektuhan. Kung mapakyas siya sa pagtuman niini, posibleng pasakaan siya og kaso nga malicious mischief, sumala sa city government. Gipasalamatan ni Ouano ang Allied Responders and Communicators of Cebu Inc. (ARCC) sa ilang tabang sa pag-ila sa giingong responsable sa vandalism. Gituman usab sa mayor ang iyang saad nga mohatag og P5,000 nga reward gikan sa iyang personal nga kwarta ngadto sa makahatag og impormasyon nga makatabang sa pag-ila sa mga responsable sa vandalism sa siyudad.

Si Roger ang ikaduhang tawo nga nalambigit sa mga kaso sa vandalism ubos sa administrasyon ni Ouano.

Niadtong Hunyo, usa usab ka lalaki nga taga-Barangay Guizo ang misurender ug miangkon nga siya ang nag-spray paint sa usa ka lugar duol sa Cebu International Convention Center. — /IBM (BANAT NEWS)