Online prostitusyon nasakpan

CEBU, Philippines — Gidakop sa National Bureau of Investigation-Central Visayas Regional Office (NBI-CEVRO) ang usa ka lalaki nga gipasanginlang nag-operate og online prostitution pinaagi sa pagpakaaron-ingnong home-service massage pinaagi sa social media. Giila sa NBI ang suspek nga si Edgar, usa ka nursing aide. Karon, temporaryo siyang gitanggong sa NBI-CEVRO samtang naghulat sa inquest proceedings tungod sa giingong paglapas sa Section 4(c)(1) sa Republic Act 10175 o Cybercrime Prevention Act of 2012.

Sumala sa NBI-CEVRO, nagsugod ang imbestigasyon niadtong Hulyo 13 human makadawat og report gikan sa usa ka concerned citizen bahin sa mga malaw-ayng advertisement sa usa ka lokal nga Facebook community page nga nagpakaaron-ingnong massage service. Gisusi ni Investigating Agent Maria Contessa D.C. Lastimoso ang maong report ug namatikdan nga ang mga advertisement mas nagtutok sa pisikal nga dagway sa nagtanyag sa serbisyo kaysa sa ilang propesyonal nga kwalipikasyon isip massage therapist.

Matud sa NBI, nakadawat usab sila og reklamo gikan sa labing menos tulo ka lalaki nga namasangil nga ang suspek nagtanyag og ilegal nga serbisyo pinaagi sa social media.

Pipila sab ka mga reklamante ang nipasangil sa suspek nga sekreto silang gikuhaan og video atol sa ilang panagkita nga walay pagtugot  nila ug gigamit kini sa pagpangayo og kuwarta. Usa kanila ang giingong nawad-an og dul-an P6,000. Aron mapamatud-an ang report, naghimo og online surveillance ang NBI niadtong Hulyo 16 ug 17. Didto ilang nasuta ang usa ka social media user nga nagtanyag og home-service massage sa dakbayan sa Sugbo ug naghatag og contact details alang sa off-site appointments. Ubos sa pagdumala ni Lastimoso, nakigkontak ang usa ka NBI operative sa suspek ug atol sa ilang panag-estoryahanay nitanyag ang suspek ang lainlaing dili ordinaryong serbisyo sa nagkalainlaing presyo.Human sa giingong pagpadala sa mga malaw-ayng materyales ug pagtanyag og ilegal nga serbisyo ngadto sa undercover operative, gipahigayon sa NBI ang entrapment operation nga misangpot sa pagdakop sa suspek. Sa dihang gipangutana bahin sa mga alegasyon, gihimakak kining tanan sa suspek.

“Sideline ra gyud nga masahe, pero dili gyud mag-offer og ingon ana. Ang client ra man gud maoy ga-ano ana… ga-ask bitaw. Maong maka-send mi’g mga ingon ana,” matud  pa niini.

Gipatin-aw sa NBI-CEVRO nga base sa ilang imbestigasyon, walay timailhan nga adunay menor de edad nga nalambigit sa maong operasyon ug ang tanang reklamante ug mga tawo nga nalambigit sa kaso pulos na mga hamtong. Gipadayag usab sa NBI ang kabalaka sa nagpadayon nga pagsaka sa mga kaso sa HIV nga matud pa mahimong mosamot pa kung dili mapugngan ang mga ilegal nga kalihokan sama niini. Matud sa NBI-CEVRO, magpadayon sila sa pagmonitor sa social media aron mapugngan ang paggamit sa mga online community group alang sa ilegal nga komersiyal nga kalihokan.—  Sheila Mae Agrabio, IBM BANAT NEWS