Nag-overloading sa motor, nasakpang naay dalang shabu

CEBU, Philippines — Tulo ka mga lalaki ang nadakpan sa mga operatiba sa Carcar City Police Station human makuhaan og mga armas ug gituohang shabu atol sa checkpoint operation sa Sitio Kapatagan, Barangay Perrelos, Carcar City, pasado alas 4:50 sa hapon niadtong Biyernes, Hulyo 17. Ang mga nadakpan giila lamang sa mga alyas "Henry," 30 anyos, residente sa Sitio Camagayan, Barangay Perrelos, Carcar City, nga maoy nagmaneho sa motorsiklo ug giila sa kapulisan nga Street-Level Individual (SLI); "Jerime," 38 anyos, residente sa Tubod Victoria Village, Barangay Valladolid, Carcar City; ug "Jannel," 26 anyos, residente sa P. Del Coro Street, Barangay Poblacion 1, Carcar City.

Sumala sa inisyal nga imbestigasyon, gikan matud pa ang tulo sa San Fernando kay mikuha’g suplay sa ilegal nga droga.

Sa pag-abot nila sa checkpoint, gisita sila sa mga pulis tungod kay nag-overloading ang motorsiklo ug wala magsul-ob og helmet ang mga sakay niini. Apan imbes nga mohunong, mipaspas hinuon ang dagan sa motorsiklo aron makalikay sa checkpoint. Gigukod sila sa mga operatiba ug nadakpan. Atol sa body search ug inspeksyon sa ilang gidala, narekober gikan kang alyas Henry ang gituohang shabu, usa ka armas nga TEC-KG9 submachine pistol nga adunay suppressor, tulo ka magasin, 23 ka buhing bala, backpack ug ang motorsiklo nga iyang gigamit. Nakuhaan usab sila ni alyas Jerime ug Jannel og mga armas nga .22 caliber Black Widow revolver nga walay serial number, tulo ka buhing bala ug  gituohang shabu.

Gituohan sa kapulisan nga ang mga nasakmit nga ilegal nga droga andam na unta ibaligya, samtang ang mga armas giingong gigamit sa mga suspetsado alang sa ilang proteksyon.

Nag-atubang karon ang tulo ka mga suspetsado og kasong Resistance and Disobedience to a Person in Authority, dugang sa mga paglapas sa Republic Act 9165 o Comprehensive Dangerous Drugs Act of 2002 ug Republic Act 10591 o Comprehensive Firearms and Ammunition Regulation Act. (BANAT NEWS)