Insulto sa syudad

Gibaharan ni Consul General Zhang Zhen sa nasud sa China ang Cebu City Government nga posibling maguba ang relasyon sa syudad ug China tungod sa pagpasiugda niini og kalihokan aron pagtimaan sa kadaugan sa Pilipinas sa kaso may labot sa West Philippine Sea.

Segun ni Zhang, makaguba sa relasyon uban sa China ang pagsaulog sa dakbayan sa Sugbo sa West Philippine Sea Victory Day niadtong Lunes isip pagtimaan sa ika-10 nga anniversary sukad sa 2016 Arbitral Ruling nga nag-ila sa katungod sa Pilipinas sa iyang exclusive economic zone diha sa WPS ug nagbasura sa pangangkon sa China.

Una niini gipadad-an sab ni Zhang og suwat ang konseho sa syudad nga nagsaway sa pagpasar niini og resolusyon nga nagdeklarar sa Hulyo 12 matag tuig isip West Philippine Sea Victory Day.

Matud niya nga di angayang tuohan ang arbitral ruling tungod kay way legal nga basihanan.

Nakasabot ko nga gusto niyang protehian ang interest sa iyang nasud isip usa ka diplomat, apan di husto ang pagpanghilabot sa local affairs sa syudad, labi pa nga dunay sagol panghulga ang iyang tuno.

Isip local government unit, katungod sab sa mga opisyal sa syudad ang pagprotehir sa interest sa Pilipinas diin kabahin ang Cebu City.

Kun gustong isaulog sa syudad ang anniversary sa arbitral award sa WPS iya ning katungod ug way si bisan kinsa nga makapanghilabot.

Nakalimot si Zhang nga demokrasya ang Pilipinas ug dili kumunista sama sa iyang nasud nga ang ilang gobyerno maoy magbuot unsay angayang saulogon o dili. Isip diplomat sa China nga dia madistino sa

Sugbo wala masakop sa iyang responsibilidad ang pagbuot unsay buhaton sa local government unit.

Ang iyang gihimo insulto alang sa mga opisyal sa syudad.

Dili sakop sa China ang Sugbo nga mahimo nilang but-an. 

Mahimong sobra ra tingali ni ang akong sugyot, apan kun akoy konsehal sa syudad akong iduso nga ideklarar si Zhang nga persona non grata tungod sa pagpanghilabot sa kalihokan sa syudad.

Ubos sa Vienna Convention on Consular Relations gi did-an ang mga diplomat nga manghilabot sa mga kalihokan sa dapit diin sila nadestino.