Sara ug Zuleika
Kon nitarung pa lang sa pagtubag si Bise Presidente Sara Duterte sa mga pangutana sa mga kongresista sa iyang confidential funds sa 2022, wala unta siya manghulga og patay kay:
• Dili supinahan sa House Committee on Good Government ang iyang mga sinaligan sa Office of the Vice President sa OVP ug Department of Education nga gipangulohan ni Chief of Staff Zuleika Lopez; ugDili mapriso ug dili ma-contempt si Lopez tungod sa iyang pagsuwat sa Commission on Audit nga dili hatagan ang House sa mga dokumento sa confidential funds ni VP Sara.
* * *
Nagpatawag og Zoom press conference sa tungang gabii niadtong Nobyembre 23, 2024 si VP Sara human siya:
• Nagdumili sa pagbiya sa Batasang Pambansa complex aron unongan si Lopez nga natanggong sa House detention facility (nga nakahatag og dakong problema sa seguridad sa House tungod sa presensiya sa daghan niyang security escorts); Nipugos sa pagsulod sa detention facility lapas sa gitugotan nga oras sa pagbisita human gipahibawo nga dad-on si Lopez sa Correctional Institution for Women sa Mandaluyong (nga maoy nahunahunaan sa House nga sulbad sa iyang pagpabilin sa Batasan).
* * *
Sa dili pa tulisukon si Lopez sa mga dumadapig ni VP Sara nga maoy sad-an sa pataka niyang pagpanghulga, imbitahon nako ang ilang pagtagad sa Senate hearing sa OVP budget nga gitambongan nilang VP Sara ug Lopez niadtong Septiyembre 2023.
Nasakpan ni Senador Risa Hontiveros nga dili katubag si VP Sara sa yanong pangutana unsay principal mandates sa OVP sa 2022-2028. Mga tubag ni VP Sara sa nisunod nga mga pangutana ni Hontiveros gigiyahan sa mga hunghong ni Lopez.
* * *
Sa ato pa, walay mahimo si VP Sara kon wala si Lopez. Mao diay. Nga sa dihang mayor pa sa Davao City niadtong 2010, nakig-away sa iyang kaugalingong amahan, si Rodrigo Duterte nga iyang bise mayor niadtong higayona, nga maoy nibabag sa iyang pagtudlo ni Lopez isip city administrator.
Mao diay. Nga giisnab ang mga imbestigasyon sa House sa nangaging katuigan ug ang impeachment proceedings sa justice committee karong tuiga. Ug pagdumili sa pag-atubang sa nagpadayong impeachment trial sa Senado. Kay dili maka-insistir nga magtapad silang Lopez. Aron makahunghong niya og mga tubag.
* * *
- Latest
