Visayas grid gipaubos sa red ug yellow alerts

CEBU, Philippines — Ang Department of Energy (DOE) nimando sa National Grid Corporation of the Philippines (NGCP), mga kompaniya sa power generation ug uban pa’ng mga operator sa industriya nga paspasan ang pagpasig-uli sa mga apektadong transmission lines ug generating units human ideklara ang red ug yellow alerts sa Visayas grid sulod sa duha ka adlaw sugod niadtong Miyerkules, Hulyo 8, 2026.

Si Energy Secretary Sharon Garin nimando sa tanang hingtungdan nga sektor nga paspasan ang pag-ayo sa mga nagubang pasilidad ug ang pagpaandar pag-usab sa mga apektadong planta sa kuryente aron mapalig-on ang suplay sa elektrisidad sa tibuok Visayas.

Ang DOE, pinaagi sa Electric Power Industry Management Bureau (EPIMB) nagkanayon nga nagpadayon kini subay sa koordinasyon uban sa mga stakeholder sa industriya samtang nagpadayon usab ang imbestigasyon sa mga hinungdan nga niresulta sa pagdeklara sa grid alerts.

Base sa inisyal nga report, ang Iloilo–Panay Energy Development Corporation (PEDC) 138-kilovolt Line 3 ni-trip nga maoy hinungdan sa pag-isolate ug forced outage sa PEDC Unit 3.

Ang maong insidente nakaapekto og dako sa operating reserves sa Visayas grid.

Gipahibalo usab sa departamento nga ang Lapu-Lapu–Basak 69-kilovolt transmission line mi-trip usab nga dugang nakaapekto sa transmission network.

Ang Visayas power grid gibutang ubos sa red ug yellow alert status kagahapon tungod kay gilaoman nga mokulang ang available nga suplay sa kuryente kompara sa panginahanglan sa mga konsumidor gumikan sa daghang power plant outages ug taas nga demand sa elektrisidad.

Base sa advisory nga gipagawas alas 8:00 sa buntag kagahaopn, ang NGCP nagkanayon nga ang red alert ipatuman gikan alas 5:00 sa hapon hangtud sa alas 7:00 sa gabii.

Gipahibalo usab nga ang yellow alert ipatuman gikan alas 3:00 sa hapon hangtud sa alas 5:00 sa hapon ug gikan sa alas 7:00 sa gabii hangtud sa alas 10:00 sa gabii.

Matud sa NGCP nga ang available capacity sa Visayas grid gi-project nga moabot sa 2,561 megawatts (MW) samtang ang peak demand gilaoman nga mosaka sa 2,568MW nga maoy hinungdan sa kakulang sa suplay panahon sa evening peak hours.

Gipasabot sa grid operator nga ang pagdeklara sa alerts tungod kini sa padayon nga pagka-offline sa dagkong coal-fired power plants sa Visayas lakip ang TVI Units 1 ug 2, ang bag-ong outage sa Panay Coal-fired Power Plant (PCPC) nga nakatangtang og 135MW gikan sa grid ug ang gilaoman nga taas nga demand sa kuryente.

Gipahibalo usab sa NGCP nga adunay 10 ka power plants nga anaa sa forced outage hangtud sa Hulyo 2026.

Sa maong ihap, upat ang wala na nag-operate sukad sa Hunyo, pito sukad sa Mayo, usa sukad sa Marso, tulo sukad sa 2025, tulo sukad sa 2024, duha sukad sa 2023, ug usa sukad sa 2021.

Subay niini, adunay 14 ka power plants nga nag-operate sa derated capacities nga niresulta sa kinatibuk-ang 959.3MW nga dili magamit nga kapasidad sa Visayas grid.

Apan ang red alert status sa Visayas power grid gibawi alas 12:45 sa udto kagahapon human niuswag ang suplay sa kuryente.

Sa ala 1:00 sa hapon nga grid status update, ang DOE nagkanayon nga ang Visayas grid adunay available generating capacity nga 2,532 megawatts (MW) batok sa peak demand nga 2,354MW nga igo aron mabawi ang red alert.

Bisan pa sa maong kalamboan nagpabilin ubos sa yellow alert ang Visayas grid hangtud sa alas 10 sa gabii nga nagpasabot nga ang operating reserves ubos gihapon sa gikinahanglang lebel bisan pa nga igo ang suplay sa kuryente aron matubag ang kasamtangang panginahanglan. BDB BANAT NEWS