Archival mopadala og suwat ngadto sa DOTr

CEBU, Philippines — Mopadala og suwat si Cebu City Mayor Nestor Archival, Sr. ngadto sa Department of Transportation (DOTr) aron ipahibalo ang iyang baroganan ug mangayo og rekomendasyon kabahin sa resolusyon nga giaprobahan sa konseho nga ibasura ang gisugyot nga realignment sa Cebu Bus Rapid Transit (CBRT) nga naglakip sa South Road Properties (SRP).

Ang maong resolusyon giduso ni Bise Mayor Tomas Osmeña sa niaging semana nga hugtanong naghangyo sa DOTr nga ibasura ang paglakip sa SRP sa CBRT alignment.

Gipasabot ni Archival nga base sa iyang nakita nga mga dokumento apil na ang SRP sa opisyal nga alignment sa CBRT.

 Ang nasabtan ni Archival sa giduso nga isyu ni Osmeña mao ang pag-una sa implementasyon sa SRP ug dili ang paglakip sa SRP.

 Buot sa bise mayor mao ang paghatag usab og prayoridad sa orihinal nga rota nga mao ang Bulacao-Talamban corridor nga hangtud karon nawani sa pagtrabaho.

Matud ni Archival nga sa iyang ulahing pagpakighinabi sa mga opisyal sa DOTr giklaro niini nga mas sayon ug mas paspas ang pagsugod sa bahin sa SRP diha sa Vestil Road tungod kay mas gamay ang maapektohang residente ug diyotay lang ang mga reklamo nga madawat sa kagamhanan itandi sa ubang bahin sa siyudad.

Ug aron nga matubag ang kabalaka sa bise mayor ug sa konseho nisugyot si Archival nga angay nga hangyuon ang DOTr sa paghimo og pagtuon aron mapalugway ang kasamtangang phase 1 sa CBRT

Gipasabot usab ni Archival nga ang kasamtangang operasyon sa CBRT mao ang gikan sa Ayala padulong sa SRP ug mahimong ipadayon hangtud sa Mambaling ug Bulacao dayon mosumpay balik ngadto sa SRP.

 Ang orihinal nga konsepto sa CBRT naglangkub sa rota gikan sa Bulacao, Mambaling, SRP, South Bus Terminal, Jones Avenue, Capitol, Escario, Ayala, IT Park hangtud sa Talamban.

Apan sa paghinumdom ni Archival nga sa administrasyon ni kanhi mayor Edgardo Labella adunay gihimong kausaban diin gipalapdan ang proyekto aron maabot ang CBRT ngadto sa Talisay pinaagi sa SRP hinungdan nga nisaka ang gitas-on sa dalan ngadto sa mga gibana-bana nga 34 ka kilometro.

Gipasalig ni Archival nga magpabilin ang orihinal nga konsepto nga gihimo ni Osmeña ug ang nahitabo lang ang pag-extend niini paingon sa Talisay pinaagi sa SRP.

Gikataho nga base sa mga dokumento sa DOTr pormal na’ng kabahin ang SRP sa proyekto ug adunay mga record nga nagpakita nga kini naaprobahan sa niaging mga administrasyon.

Gitumbok ni Archival nga ang DOTr mao ang adunay katungod nga mohukom sa unsay angayan sa CBRT gumikan kay usa kini ka proyekto sa nasudnong pangagamhanan ug dili sa kagamhanan sa Dakbayan sa Sugbo mao nga walay gahum ang siyudad sa pag-usab o pagkansela sa alignment. BDB BANAT NEWS