“Sigabo” production team gipatawag sa MTRCB

CEBU, Philippines — Gipatawag sa Movie and Television Review and Classification Board (MTRCB) ang production team sa hit primetime series nga “Sigabo” sa ABS-CBN isip kabahin sa ilang “Responsableng Paggabay” initiative human nakadawat  og reklamo kabahin sa giingong sobra nga bayolente nga mga eksena  sa maong serye nga gibidahan ni Coco Martin.

Suma pa sa MTRCB , nipahigayon sila og  compliance seminar sa niaging adlaw kauban sa mga producer ug representante sa serye sa ilang buhatan  sa Quezon City.

Tumong sa maong kalihokan ang pagpalig-on sa dayalogo tali sa ahensya ug sa production team aron masabtan ang mga sumbanan sa “age-appropriate content”.

Suma pa  ni MTRCB Chairperson ug CEO Lala Sotto, importante nga masuportahan ang industriya sa telebisyon sa paghimo og dekalidad nga mga programa nga adunay pagtagad sa epekto niini sa mga tumatan-aw, ilabi na sa mga bata.

Gidawat usab sa positibong paagi sa CCM Film Productions, producer sa “Sigabo,” ang inisyatiba sa MTRCB. Nagpasalamat ang kompanya sa higayon nga mas masabtan ang mga giya sa ahensya ug mipasalig sa responsableng paghimo og mga materyal.

Kathryn, James ug Maja, midalit og pasiunang pakilig

Gipakita  na sa ABS-CBN ang  trailer sa gipaabot nga primetime series nga “Someone, Someday” nga gibitoonan  nila Kathryn Bernardo, James Reid ug Maja Salvador.

Gipakita sa trailer ang istorya ni Billy (Kathryn), usa ka babaye nga naningkamot alang sa iyang pamilya isip CEO sa dating app nga Love List, samtang nag-atiman sa iyang manghod nga si Oliver.

Sa iyang pag-atubang sa mga pagsulay, mas molig-on ang  panaghigalaay nila ni  Jordan (James) ug mas mahimong komplikado ang iyang kinabuhi sa pag-abot ni Abby (Maja), usa ka misteryosong babaye.

Kasagaran nga  reaksyon viewers  kay gikilig sa mga eksena sa mga bida .  Ang “Someone, Someday” magsugod karong  Hulyo 27, alas 8:45 sa gabii sa  ALLTV2, TV5, A2Z, Kapamilya Channel , Kapamilya Online Live, Netflix ug  iWant.

Milugwa sa Paris Haute Couture Show

 Nalakip sila Heart Evangelista  ug Kylie Verzosa sa  celebrities nga nanglingkod sa  atubangang bahin sa  Fall/Winter 2026–2027 Haute Couture show sa  L'Olympia didto sa Paris. Kauban nila ang Thai actress-mode nga si  Davika Hoorne.

“Uwi Na Tayo”

Gi-release na sa OPM singer-songwriter nga si  Amiel Sol ang iyang bag-ong awit nga "Uwi Na Tayo." Pipila pa lang ka adlaw gikan sa paglusad niini , nakalangkat dayon kini og 100,000 streams sa  Spotify .

Biyaheng Bente Cebu

Human gianunsyo ang iyang  US tour,  gipahibalo sa   singer nga si  Yeng Constantino nga dalhon pud niya dinhi sa Cebu ang iyang 20th anniversary concert . Ang iyang konsyerto nga nag-ulohan og "Biyaheng Bente Cebu" kay pagahimoon sa  SM Seaside Cebu Arena karong  September 20 ug si  John Prats ang direktor niini.Special guests ni Yeng sa maong konsyerto  kay sila  Jason Dy, Zephanie, El Manu, ug Jessy Kang. 

Karakter ni Bela sa “Bloodnvs Duty” gipatay

Nakadawat og mga pagdayeg ang aktres nga si Bela Padilla  gumikan sa iyang kusog ug emosyonal nga pagdala sa karakter ni Lara Angeles sa hit primetime series nga “Blood vs Duty” sa ABS-CBN.

Nakurat ang viewers  sa pagkamatay sa iyang karakter, nga nailhan tungod sa kaisog ug abilidad isip intelligence agent.

Gidayeg usab si Bela sa iyang paghatag hustisya sa papel ni Lara isip usa ka anak nga nangita og panimalos alang sa iyang mga ginikanan.

Ang katapusang  tulo ka semana sa “Blood vs Duty,” kay makita 8:45 pm ,Lunes hangtod  Biyernes sa ABS-CBN sa ALLTV2, A2Z, Kapamilya Channel, ug Kapamilya Online Live, . Makita usab kini sa Netflix ug iWant.

Unang upat ka ka entries sa MMFF 2026, gianunsyo  na!

Gianunsyo na dili pa lang dugay  ang unang upat ka opisyal nga entries sa 52nd Metro Manila Film Festival (MMFF), nga  ipasalida sa mga sinehan karong Disyembre.

Nalakip niini  ang  “2nd Miracle in Cell Number 7,” nga gibitoonan  ni Aga Muhlach. Kini ang sequel sa Filipino adaptation sa hit Korean drama nga unang gipasalida niadtong 2019.

Pasok  usab sa listahan ang “Amir” sa GMA Pictures. Gibidahan  kini nila Argus Aspiras, Dennis Trillo, Will Ashley ug Glaiza de Castro, ubos sa direksyon ni Zig Dulay.

Nalakip   sa unang batch ang horror film nga “Haunted Carnival,” nga nga gibidahan  nila Julia Barretto, Fyang Smith, Maricel Soriano, James Reid ug John Arcilla. Wala usab nagpaulahi ang  “The Greatest Showdown,” nga gibitoonan sa mga komedyante nga sila Vice Ganda ug Vic Sotto.