DOE: Tanang power grid sa nasud normal na ang operasyon

CEBU, Philippines — Ang Department of Energy (DOE) nipahibalo nga ang tanang dagkong power grids sa nasud nag-operate na ubos sa normal nga kahimtang human nibalik ang dugang nga generating capacity sa Visayas.

Atol sa virtual press conference kagahapon, si DOE Undersecretary Felix William Fuentebella Marasigan nagkanayon nga normal na ang operasyon sa Luzon Grid diin ang panginahanglan sa kuryente nga niabot ngadto sa 16,623 megawatts (MW) igo na’ng nasuplayan.

Matud ni Marasigan nga nalig-on na usab ang Visayas grid human sa malampusong pag-synchronize sa Panay Energy Development Corporation (PEDC) Unit 3 nga nakadugang og 150 MW sa sestema.

Gipadayag ni Marasigan nga nisulay una ang PEDC Unit 3 sa pag-synchronize sa grid niadtong Miyerkules sa buntag apan nakasinati kini og gagmay’ng teknikal nga problema.

 Hinuon malampuson kining na-synchronize mga alas 2:37 sa hapon sa maong adlaw ug hinay-hinay nga gipataas ang produksiyon niini.

Sukad sa nisunod nga adlaw wala na’y yellow alert sa Visayas grid ug nagpasabot kini nga nibalik na sa normal ang lebel sa power generation ug suplay.

Apan bisan pa sa maong kalamboan nagpadayon ang DOE sa pagpangandam alang sa mosaka nga panginahanglan sa kuryente tungod sa pagtubo sa ekonomiya ug sa mga seasonal nga hinungdan.

Si Marasigan nagkanayon nga gihatagan og espesyal nga pagtagad sa departamento ang Visayas pinaagi sa pakigtambayayong sa National Grid Corporation of the Philippines (NGCP) ug sa upat ka pribadong proponents aron mag-deploy og alternatibo ug limpiyo nga teknolohiya sa enerhiya nga makahatag dayon og suporta sa mga panahon nga hugot ang suplay sa kuryente.

Nagplano usab ang DOE sa backup power systems sa Cebu, Panay ug Negros nga adunay target nga makadugang og 270 MW nga reserve capacity.

Ug giingong katunga sa maong plano nga kapasidad gilaoman nga mainstolar sa labing sayon nga higayon.

Samtang si DOE Secretary Sharon Garin nipadayag nga ang pinakaulahing kalamboan sa Visayas grid nagtapos sa dul-an duha ka bulan nga balik-balik nga mga pasidaan sa kakulang sa suplay nga nagsugod pa niadtong Mayo ug dako ang natabang sa pagpalig-on sa operating reserves sa rehiyon nga nakapamenos sa risgo sa rotating brownouts.

Gibutyagni Garin nga nagpadayon ang DOE sa pagkoordinar sa pagpaandar pag-usab sa uban pa’ng dagkong power plants aron mas mapalig-on pa ang suplay sa kuryente sa Visayas.

Lakip sa mga planta nga anaa pa sa scheduled maintenance mao ang Therma Visayas Unit 1 ug 2 nga matag usa adunay kapasidad nga makamugna og 169 MW ingon man ang Kepco SPC Unit 1 sa Cebu.

 Gilaoman nga makabalik sa operasyon ang duha ka Therma Visayas units sa kataposan sa Agosto 2026. (BANAT NEWS)