Analog cellphones pwede ra – Gica

CEBU, Philippines — Duha ka adlaw sukad gipatuman ang pagdili sa paggamit og cellphones sa mga pampublikong eskwelahan sa Dumanjug, gipahibalo ni Mayor Guntrano "Gungun" Gica nga gitugotan gihapon ang paggamit og analog o keypad phones sa mga estudyante.

Matud ni Gica, ang maong desisyon nahisgutan atol sa ilang miting uban sa mga school heads, district supervisors, kapulisan, MDRRMO, MSWDO ug traffic personnel aron susihon resulta sa polisiya ug tan-awon ang posibleng kausaban nga buhaton.

Sumala sa mayor, nagkasinabot ang mga opisyal nga kinahanglan hatagan og panahon ang mga ginikanan ug estudyante aron maenad sa bag-ong polisiya.

Tungod kay bag-o pa man ni gipatuman, ang maembargong cellphones pwede pang ipakuha sa ilang ginikanan o guardian sa opisina sa principal para sab sila mapasabot sa katuyoan sa polisiya.

Apan sugod sa Agosto hugtan na ang lagda , ang mga makumpiskang smartphones iuli lang inig human sa school year.

Una ng giklaro ni Gica nga ang polisiya dili reaksyon sa bag-ohay nga insidente sa pagpamusil ug pagpanunggab nga nalambigit ang mga estudyante sa ubang lugar.

Matud niya dugay nang gihisgutan sa lokal nga kagamhanan ang maong polisiya aron molambo ang kalidad sa edukasyon sa lungsod.

Kini human nga sa miaging Municipal School Board meeting gipadayag sa mga school heads ang ilang kabalaka tungod sa kaubos sa performance sa pipila ka mga estudyante, diin adunay Grade 7 learners nga naglisod gihapon sa mga leksyon nga pang Grade 3.

Gawas sa cellphone policy, gipasundayag usab ni Gica ang ubang programa alang sa edukasyon sama sa Dahunog Dumanjug Tutorial Initiative, diin migahin ang LGU og hapit P6 milyones alang sa summer catch-up tutorials sa Math ug English para sa mga estudyante sa Grades 1 hangtod Grade 12 nga magsugod karong bulana..

Plano sad nila ang pagpalit og lima hangtod walo ka school buses aron libre ang sakay sa mga estudyante ug mga empleyado sa eskwelahan ug magtukod sab og public library para mga estudyante.—  IBM BANAT NEWS