Revolver nga gigamit sa menor adunay kaparehong serial number

CEBU, Philippines — Gipadayag ni Police Colonel Elmer Cinco, hepe sa Regional Civil Security Unit (RCSU)-7 kagahapon nga ang kalibre .38 revolver nga na-recover gikan sa usa sa mga menor de edad nga suspek sa pagpamusil ngadto sa San Jose National High School, Dakbayan sa Tacloban adunay kaparehong serial number sa laing armas nga rehistrado sa usa ka Cebu City-based security agency ug gi-assign sa usa ka security guard sa Bohol.

Apan managlahi nga armas ang na-recover sa Tacloban ug ang usa nga gigamit sa security guard sa Bohol.

Ang RCSU-7 nakig-coordinate sa RCSU-8 nga maoy nangulo sa imbestigasyon sa maong kaso.

Sa ilang pakisusi nasayran sa mga imbestigador nga anaa pa sa kustodiya sa usa ka security guard nga gi-assign sa usa ka institusyon sa Bohol ang armas nga adunay kaparehong serial number.

Gi-recover kini sa mga otoridad ug gipaubos na sa forensic examination sa Bohol.

Matud ni Cinco nga wala nila isalikway ang posibilidad nga usa sa mga armas ang gi-clone.

Nasuta usab nga parehong Armscor caliber .38 revolver ang duha ka armas ug halos pareho ang hitsura niini.

Apan gikataho nga adunay gamay nga epoxy material nga namatikdan duol sa barrel sa armas nga na-recover sa crime scene. Si Eastern Visayas Police Regional Director Brigadier General Jason Capoy nibutyag nga nagsugod ang plano sa mga menor nga suspetsado sukad pa niadtong buwan sa Abril o Mayo.  Ang 14-anyos nga suspek maoy nakapabuto sa daghang mga bala gamit ang glock 17 caliber .9mm pistol ug naka-reload pa atol sa pag-atake.

Matud ni PNP spokesperson Police Colonel Allen Rae Co nga na-recover sa mga imbestigador ang 21 ka fired cartridge cases, 13 ka live cartridges ug daghang mga bala sa crime scene.

Ang glock 17 nga gigamit sa 14-anyos nga suspek rehistrado sa iyang iyaan nga usa ka abogada ug polis nga nadestino sa Police Regional Office-8.

Samtang ang 15-anyos nga suspek nakapabuto lang og usa ka bala gikan sa caliber .38 revolver.

Ang PNP nipasaka na og mga kaso batok sa mga tawo nga posibleng nakatabang sa mga menor de edad sa pag-angkon sa mga armas samtang gisugdan usab ang administratibong kaso batok sa polis nga tag-iya sa glock pistol.

Gikompirma sa PRO-8 nga nakapasaka na kini og mga kasong kriminal batok sa 15-anyos nga suspek pinaagi sa inquest proceedings sa Office of the City Prosecutor sa Tacloban City.

Ang mga reklamo naglangkub sa tulo ka counts sa murder, tulo ka counts sa frustrated murder ug daghang counts sa serious physical injuries. (BANAT NEWS)