Laing peke nga Pinoy

Luyo sa kaguliyang sa politika nga nakapabahin-bahin sa mga opisyal sa nasud ug sa mga Pilipino, usa ka butang ang angayang natong hinuktukan labi pa sa atong mga opisyal. Kini mao ang seryosong hulga sa nasudnong seguridad gikan sa mga langyaw nga gustong mangilog sa atong teritoryo.

Labihan ka seryoso sa hulga nga nagkinahanglan sa panaghiusa sa mga Pilipino labi pa sa atong mga opisyal inay nga mag-away tungod sa politika.

Ang pagkasikop sa laing mini nga Pilipino didto sa Roxas sa Palawan niadtong Mayo 12 nagpakita unsa ka lapad na sa problema sa atong seguridad.

Labaw kay sa pagpunay og panghasi sa mga barko sa China sa mga sakop sa Philippine Coast Guard ug sa mga Pinoy nga mangingisda didto sa West Philippine Sea mao ang wala nato mabantayi nga pag-infiltrate sa China sa atong nasud pinaagi sa pagtanom og mga ispiya nga nagtakuban isip mga Pilipino.

Ang mga ahente sa Bureau of Immigration (BI) midakop niadtong Mayo 12 sa 39 anyos nga Chinese national nga nailhan nga si Xu Haishen didto sa Roxas, Palawan. Nagpaka-aron ingnon siya nga Pilipino pinaagi sa pagpeke sa iyang identity sama sa gibuhat ni Alice Guo nga nahimo gyud gani nga mayor sa usa sa mga lungsod didto sa Quezon.

Dili sulagma ang pag-abot ni Xu didto sa Palawan ug labaw na nga dili ni ordinaryong kaso sa illegal alien.

Klaro ni nga kabahin sa mas lapad ug dilikado nga hulga sa atong nasudnong seguridad sanglit ang Palawan duol sa West Philippine Sea.

Tungod kay nagpakaaron-ingnon man siya nga usa ka Pilipino, sayon ra alang ni Xu ang pagpaniid sa kalihukan sa atong mga sundalo ingon man ang pagpamalit og mga kabtangan sama sa yuta nga mahimo nilang magamit sa ilang operasyon batok sa atong nasud.

Pinaagi sa mga mini nga Pinoy sama ni Xu, mahimong hinay-hinay nilang makontrolar ang atong mga kumunidad nga wala tay kalibutan.

Busa inay hutdon sa atong mga opisyal ang ilang oras ug kusog sa pamolitika, mas maayo tingali nga ilang hinuktukan og maayo unsaon nga sila makatabang pagsulbad niining maong gumunhap.