Ibasura nila si Sara
Si Bise Presidente Sara Duterte padayon nga giulog-ulogan sa defense lawyers sa iyang impeachment trial nga bisan nasumiter ug mahimo gani nga maablihan na karong semanaha kababagan nila ang pagpresentar isip mga ebidensiya batok niya ang iyang financial records.
Sama nga wala sila kapugong sa pagsupina sa Senate impeachment court sa bank records sa siyam ka mga bangko sa Davao City ug Metro Manila ug income tax returns (ITRs) sa Bureau of Internal Revenue (BIR) nilang VP Sara ug sa iyang bana, walay mahimo ang depensa sa pag-insistir pagtago nila.
* * *
Duha ka dagkong rason nganong sa kataposan, bisan sa ilang paglangay, makit-an na sa publiko tinuod ba ang binilyon ka pesos nilang kuwarta sa bangko:
• Una, ang kahugot sa bugkos sa kasaysayan, maglisod ang Senado sa pagsukwahi sa pag-abli sa nangaging impeachment courts sa bank records nilang kanhi Presidente Joseph Estrada sa 2001 ug anhing Chief Justice Renato Corona sa 2012; ugIkaduha, ang dili malalis nga kamada sa Senado, napalagpot na si kanhi Senate President Alan Peter Cayetano ug dili iyang mga alyado ang mayoriya sa senator judges.
* * *
Kon motakdo ang bank records ni VP Sara sa iyang statement of assets, liabilities and networth nga P98 milyones sa 2025, ug kon mao say gibayran bga income tax sa BIR, mauwaw ang prosecutors, ma-absuwelto sa impeachment trial ug segurong mobanos sa Malakanyang sa 2028.
Pero ang pagtago sa ilang financial records sulod na sa 10 ka tuig, sukad sa unang pagpasangil ni kanhi Senador Antonio Trillanes niadtong 2016, maoy timaan nga duna silay nangalisbo nga sekreto.
* * *
Sa pikas nga bahin, kon mapamatud-an ang bilyones ni VP Sara, bisan P30 milyones ray suweldo sukad sa 2007 ug bisan sa mga dokumento sa Securities and Exchange Commission nga gamay rang kita, alkanse pa gani ang pipila, sa ilang mga kompaniya ug nga walay kita ang ilang law office, mahagsa ang pagtakoban ni VP Sara.
Bisan lunod patay nga mga dumadapig, nga sama sa kinabag-an sa katawhan naglisod sa inadlaw nga mga panginahanglan, maglisod sa pagpadayon pagsuporta niya. Nga walay kaisog sa pagtug-an pilay iyang kuwarta. Ni kaligdong sa pagpasabot diin gikan ang makalilisang niyang katigayonan.
* * *
- Latest
