Novena Perpetua ngadto sa Mahal nga Birhen Maria sa Carmen

Sanglit hapit na ang pangilin sa Mahal nga Birhen sa Carmen akong ipaambit kaninyo ang novena sa Mahal nga  Birhen sa Carmen. Unta makatabang kini sa atong kinabuhing Kristohanon.

Pag-Ampo sa Novena

O Maria Inahan sa Dios ug among Rayna sa Carmen, mapasalamaton ako kanimo kay gikahimut-an mo man nga dawaton mo ako ug mahimong ubos sa imong panalipod pinaagi sa imong eskapularyo. Nagasaad ako mamahimong matinud-anon nimong anak, ingon man paningkamotan ko ang pagpasidungog kanimo, pag-awat sa imong kinabuhi sa pagtuo, ug pagpakighiusa sa imong Anak.

Nangaliyupo ako kanimo O Mahal nga Inahan nga mahimong akong patrona ug tigpanalipod taliwala sa tanang mga kakuyaw ning kinabuhia ug itugot mo unta alang Kanako ang mga grasya ug mga panginahanglan ug nga unta ihatag mo unta alang Kanako ang paglahutay (Ibungat sa hilom ang imong mga intensiyon)

Mahimo unta alang Kanako ang balaang eskapularyo nga akong gisul-ob agig timaan sa imong inahanong gugma ug pag-atiman alang Kanako, mopahinumdom Kanako nga magpabilin akong matinud-anon nganha kanimo ug sa imong anak nga si Jesus.

Giyahi ako sa akong panaw sa kinabuhi, panalipdi ako batok sa sala, ug mamahimo ikaw nga  mabungahong tinubdan sa panalangin nga nagagikan sa imong Anak nga si Jesus alang Kanako. Sa takna sa akong kamatayon, panalipdi ako batok sa tanang paghasmag sa impiyerno ug tabangi ako nga luwas nga mahiabot sa walay katapusang kalipay sa langit. Amen.

V. Maria, Inahan sa Carmen, I ampo kami

R. Aron mamahimo kaming takus sa mga saad ni Kristo.

Mag-Ampo Kita

O Dios, gipasidunggan mo ang Orden sa Carmen uban ang linain nga titulo sa Mahal nga Birhen Maria kanunay’ng Ulay ug Inahan sa Imong Anak. Itugot nga maloloy-on nga pinaagi sa iyang Inahanong Panalipod, matugotan unta kaming moabot nianang walay katapusang kahiusahan uban kanimo. Pinaagi sa among Ginoong Jesukristo imong Anak nga buhi ug hari diha sa kahiusaha sa Espiritu Santo, Dios nga usa hangtud sa kahangturan. Amen.

Akto sa Konsagrasyon

O labing putli nga Birhen Inahan sa Dios Rayna ug Katahum sa Carmen. Ako (isulti nga ngalan) samtang nagasul-ob ning imong Balaang Eskapularyo nipili kanimo nga akong Inahan ug Rayna. Akong ihalad kanimo ang tibuok kong kinabuhi ug busa, akong ikonsagrar ang akong kaugalingon nganha sa imong putli uyamot nga kasingkasing. Hinaut nga ang Balaang Eskapularyo sa Carmen nga akong pagasul-obon adlaw ug gabii hangtud sa akong kamatayon, ang mosalamin unta sa pagkamapaubsanon, ug kaputli, ang timaan sa kalimpiyo ug kayano, simbolo sa walay hunong nga pag-ampo Ug usa ka linain nga timaan sa akong konsagrasyon sa imong Putli Uyamot nga Kasingkasing. O Labing tinamod nga Birhen sa Carmen, hinaut unta nga ang Balaang Eskapularyo magdasig Kanako sa pagpuyo sa kinabuhi diha sa diwa sa akong konsagrasyon sa tibuok Nakong kinabuhi.

Magputli unta kini sa akong lawas ug magsantos sa akong kalag. Uban sa imong giya, maghatud unta kini Kanako ngadto sa Kristohanong kahingpitan diin, ang tawag sa Dios alang Kanako. Sa takna sa akong kamatayon, hinaut nga kining maong timaan sa akong kaluwasan magluwas Kanako gikan sa kalayo sa impiyerno ug sa mga kasakit sa purgatory sumala sa imong mahimayaong mga panaad. Mahiusa unta ako kanimo akong inahan ug Rayna sa walay katapusang kalipay sa langit. Amen.