P286.58 bilyones nay utang
Unsa na man kadako ang utang sa buhis sa pamilyang Marcos karong 2026? Wala koy lista sa tanan nilang obligasyon sa Bureau of Internal Revenue (BIR). Gawas sa nahibaw-an sa kadaghanan nga makalilisang nilang utang sa estate tax.
Kay wala man bayri, ang P23 bilyones nga bayranan nila sa estate tax niadtong 1989, kanus-a namatay si Ferdinand Marcos Sr., niburot ngadto sa P203.8 bilyones niadtong 2021. Ambot pila na kaha ang sulbong sa ilang utang human sa 37 ka tuig nga patung-patong nga surcharges ug interes.
* * *
Nangahas ko og pangutana niini tungod sa pasidaan ni retired Supreme Court Senior Associate Justice Antonio Carpio nga ubos sa balaod ang utang sa buhis, aron dili mapapas, kinahanglan nga paninglon kada lima ka tuig. Karong 2026 ang ikalimang tuig human sa kataposang demand letter sa BIR ngadto sa mga Marcos niadtong Disyembre 2, 2021.
Si kanhi BIR Commissioner Caesar Dulay, tinudlo ni kanhi Presidente Rodrigo Duterte, maoy nisuwat nilang Ferdinand Marcos Jr. ug Imelda Romualdez Marcos, mga administrador sa Marcos estate, nga napilo-pilo na og kasiyam ang ilang utang. Kon walay laing demand letter nga luwatan ang BIR karong tuiga, peligrong dili na makolekta ang utang.
* * *
Walay timaan nga si BIR Commissioner Charlito Martin Mendoza dunay kaisog sa pagpaningil sa presidente nga nitudlo niya sa puwesto. Si kanhi BIR Commissioner Lilia Guillermo nga nipahibawo nga maningil siya sa utang sa tukmang panahon gipalagpot ni Marcos Jr. human lang sa unom ka buwan sa katungdanan.
Kon mokakak si Mendoza ug dili mangolekta sa mga Marcos sa wala pay Disyembre 2 karong tuiga, goodbye bunot ang utang sa mga Marcos nga dako unta og ikatabang sa nasudnong ekonomiya.
* * *
Aron pagsuway pagtubag sa pangutana sa ibabaw, nagpatabang ko sa retiradong Sugbuanong opisyal sa BIR. Kinsa nipakurat dayon nako pinaagi sa pag-ingon nga ang dakong tubo sa utang nagrepresentar og Compound Annual Growth Rate (CAGR) nga 7.06% kada tuig.
Ubos sa National Internal Revenue Code, ang utang sa buhis patongan og 25% nga surcharge ug 20% nga interes kada tuig. Iyang banabana: Ang estate tax liability sa mga Marcos niabot na og P286.58 bilyones karong tuiga.
* * *
- Latest
