Mga pribadong tunghaan gitugotang modesisyon sa pagsuspenso sa klase

CEBU, Philippines — Ang mga pribadong tunghaan sa Dakbayan sa Sugbo ang padesisyonon kon ipadayon ba o suspendehon ang klase panahon sa haze depende sa lebel sa polusyon sa hangin ug sa Air Quality Index (AQI).

Matud ni Kenneth Siasar, chief of staff ni Mayor Nestor Archival nga gituki sa inter-agency meeting niadtong Oktubre 15 ang gisugyot nga pamaagi aron mabalanse ang pagpanalipod sa panglawas sa mga tinun-an ug ang paglikay sa kanunay nga pagkabalda sa ilang klase.

Ang mga pribadong tunghaan mahimong modesisyon kon ipadayon ba ang klase kon ang AQI anaa sa 151 hangtud sa 200 nga giklasipikar sa Environmental Management Bureau nga “very unhealthy”.

Ug kon mopili ang mga tunghaan nga ipadayon ang klase niini nga lebel sa polusyon giawhag kini nga magsul-ob og face mask ang mga tinun-an.

Apan matud ni Siasar nga otomatikong isuspenso ang klase kon molapas na sa 200 ang AQI.

Gipasabot usab niya nga bisan hatagan og diskresyon ang mga eskwelahan nagpabilin ang otoridad sa mayor sa pagpanginlabot kon ang polusyon sa hangin mahimong dakong hulga sa panglawas sa publiko.

Subay niini, nagtinguha ang mga stakeholder sa gobiyerno ug pribadong sektor nga maghimo og hiniusang giya sa suspensiyon sa klase tungod sa dili maayong kalidad sa hangin human makita ang kalainan sa mga sukdanan nga gigamit sa nagkalainlaing ahensiya.

Matud ni Capitol Piso Health Consultant Dr. Elisse Nicole Baricuatro Catalan-Vizcayno nga usa sa mga isyu nga nigawas sa duha ka oras nga konsultasyon mao nga ang Department of Education (DepEd) naggamit sa particulate matter 2.5 (PM2.5) samtang ang Department of Environment and Natural Resources-Environmental Management Bureau (DENR-EMB) nagpagawas og Air Quality Index (AQI).

Gilaoman nga makompleto sa sunod semana ang hiniusang giya aron adunay klarong basehan ang mga lokal nga kagamhanan bisan pa nga ang mga mayor gihapon ang mohimo sa kataposang desisyon sa pagsuspenso sa klase.

Gipadayag usab sa mga pediatric pulmonologist nga ilakip ang mga bata hangtud sa 12-anyos isip sensitibong grupo tungod kay nagpadayon pa ang paglambo sa ilang baga ug mas dali silang maapektohan sa polusyon.

Samtang si Provincial Health Officer Dr. Sheila Faciol nibutyag nga nakasentro sa Central Cebu ang kasamtangang pag-monitor sa kalidad sa hangin hinungdan nga kulang ang datos gikan sa amihanan ug habagatang bahin sa lalawigan.  Mitchelle L. Palaubsanon, BDB BANAT NEWS