Nawala ang gana sa relasyon

Dear Tito Miguel ,

Maayong adlaw, tawga lang ko sa pangalang MJ, taga Barangay  Inayawan, Cebu City. Naa koy uyab nga si Charice ug upat ka tuig na ang among relasyon. Samtang nagkadugay ang among relasyon , nawala ang akong gana sa among relasyon. Nagsugod kini sa dihang  na-busy na si Charice sa iyang work ug usahay nalang mi magkita .

Dili man sad ko ka-demand og dakong oras niya kay nasayod ko kung unsa ka importante ang iyang trabaho.  Laktod pagkaistorya , nagkahupas ang akong gugma kaniya .

Klarohon nako, wala ko'y laing gikalingawan nga babaye. Basin nakalitan ra ko sa among sitwasyon .

Apan ang akong problema, nagduha-duha ug nahadlok ko kon unsaon nako kini pagsulti kaniya. Dili ko gusto nga masakitan og  maayo si Charice tungod kay wala man siyay nabuhat nga daotan .

Nanghinaot ko nga matagaan ko nimo og tambag Tito Miguel , kon unsa ang saktong lakang nga kinahanglan nakong buhaton.  — MJ

* * *

MJ,

Mao na’y giingon nga dili ra ang pagbati ang basehan sa relasyon. Ka’y kun tungod ra sa pagbati, wala’y relasyon nga magdugay kay mausab ra na mata’g karon ug unya. Gani, kun sundon ang gibati sa mga magtiayon, ang uban hagbay ra nagbuwag o nagpinatyanay.

Ang kanindot sa inyo Kay  dili pa mo kasado. Busa puwede pa ka moatras mentras wa pa mo mahinayak. Ayaw basola imong kaugalingon sa paghupas sa imong pagbati. Wala man na nimo tuyoa. Apan ang imong problema ka’y unsao’g sulti sa imong uyab nga wa na ka’y gana.

Pangutan-a asa na ka dapit sa iyang kasingkasing, o dili ba kaha unsa na’y estado sa inyong  relasyon. Kay kun busy na kaayo siya sa iyang trabaho, wala na’y panahon kanimo, usa ra ang sigurado, dili na ka niya prayoridad. Basin pareho ra mo nga nihupas na ang pagbati sa usa’g usa. Kay kun hingpit pa unta ka niya nga gihigugma, mangita gyud na’g paagi magkita mong  duha. Apan ngano mora ma’g nakakita siya’g rason nga dili na mo magkita?

Kun motubag nga iyang  pagbati wala mausab, ingna dili na kini makita sa iyang  mga buhat. Mangutana gyud dayon na nimo ngano nangutana ka, diha na ka mobolada. Ingna nga tungod Kay  di na mo magkita, mora’g naanad na ka nga wala siya, ang imong gibati karon dili na pareha sa una. Kun moklaro siya nga nihupas na iyang gibati, wala na’y problema. Tabla na mong duha. —Tito Miguel

Magpatambag ka? Ipada kang Tito Miguel: 0991-318-9366