Higit P3 milyong halaga ng ecstasy nasabat sa post office

MANILA, Philippines — Nasabat ng Bureau of Customs (BOC) at ng Philippine Drug Enforcement Agency (PDEA) ang isang parcel na naglalaman ng humigit-kumulang 743 gramo ng pinaghihinalaang ecs­tasy na may halagang P3,157,750 sa Central Mail Exchange Center (CMEC) kahapon.

Ang pagkakakum­piska ay nagresulta rin sa pagkakadakip sa claimant nito sa EMS Window.

Dumating ang parcel mula sa Canada noong Setyembre 15, ay idineklarang naglalaman ng mga bag at backpack, damit pambata, tsokolate at kendi, laruan ng mga bata, suplemento, sapatos, at tsinelas.

Nang suriin, natuklasan ng mga tauhan ng Customs ang pinaghihinalaang ilegal na droga na nakatago sa loob ng kargamento.

Inilipat sa pag-iingat ng PDEA ang mga epektos at claimant para sa isang masusing imbestigasyon at disposisyon.