Anti-Bullying Desk gisugyot

CEBU, Philippines — Gisugyot sa Cebu Police Provincial Office (CPPO) ang pagtukod og anti-bullying desks ug pag-instalar og dedicated alarm systems sa mga eskwelahan sa Cebu, human 19 ka school threat incidents ang giimbestigahan sa kapolisan sukad Hulyo. Gipadayag ni CPPO Director Police Col. Abubakar Mangelen Jr. ang mga rekomendasyon atol sa regular session sa Cebu Provincial Board niadtong Sept. 14, diin giimbitar ang nagkadaiyang ahensya aron hisgutan ang seguridad ug kahandam sa mga eskwelahan. Matud ni Mangelen, ang anti-bullying desks dili lamang dapat responsibilidad sa kapolisan, kinahanglan suportahan sa barangay officials, school authorities, parent-teacher associations (PTAs) ug student governments.

“We also would like to propose that an anti-bullying desk be created in all of our schools supported by our barangay officials, school authorities, PTA and even school government,” ingon ni Mangelen. Gisugyot usab ni Mangelan ang pagbutang og alarm system nga espesipikong gamiton kung adunay shooting incident aron mas paspas nga maalerto ang mga estudyante, personnel ug awtoridad sa seryosong hulga.

19 school threats

Sumala pang Mangelen, 19 ka school threat incidents ang giimbestigahan sa CPPO gikan Hulyo hangtod Septiyembre, nga nalambigit ang mga eskwelahan sa 15 ka local government units. Lakip sa mga lugar nga natala ang Argao, Bantayan, Barili, Bogo, Carcar, Carmen, Consolacion, Cordova, Danao, Liloan, Pinamungajan, San Fernando, San Remigio ug Talisay City. Duha ka insidente ang natala sa Carcar, Liloan ug San Fernando, samtang tulo sa Talisay City. Sa 19 ka insidente, 13 ka mga suspek ang nasuta sa kapolisan ug gidala sa police stations alang sa imbestigasyon. Siyam niini mga menor de edad.

Tulo Naaresto

Tulo ka tawo ang gidakop tungod ani  sa Bantayan, Pinamungajan ug Toledo. Sa Pinamungajan, usa ka .357 revolver ang nakumpiska, samtang bomb joke ang nalambigit sa insidente sa Toledo.

Naay upat ka insidente diin wala pa mailhi ang mga suspek ug ang imbestigasyon uban sa tabang sa Regional Anti-Cybercrime Unit (RACU), ilabina sa pag-ila sa mga nag-post sa hulga sa social media. Namatikdan usab sa CPPO nga kasagaran sa mga hulga kasagarang mogawas sa panahon nga adunay eksaminasyon o deadline sa pagsumite sa school requirements ug gihimo na nila ni karon nga modus operandi aron makaikyas.

Interbensyon

Ang mga menor de edad nga nangasakpan gipaubos na sa intervention depende sa mga pasilidad nga anaa sa ilang lugar.

Ang uban giatiman pinaagi sa Municipal Social Welfare and Development (MSWD), samtang ang mga lugar nga walay susamang pasilidad naggamit sa community intervention program. Sa kaso sa Pinamungajan diin nakumpiska ang armas, ang estudyante gipailalom sa discernment test sa municipal social worker, gipaabot pa kung ang bata ang kasohan o ang guardian nga miangkong iya ang armas.Giawhag sab ni Mangelen ang pag-apil sa PNP, Armed Forces of the Philippines ug Philippine Drug Enforcement Agency sa mga school board, lakip ang school authorities sa mga desisyon kalabot sa security threats.

Gisugyot usab niya ang pag-deploy og usa ka police officer matag eskwelahan aron motabang sa seguridad. Gisugyot pa ni Mangelan nga maghimo ang mga eskwelahan og inventory atol sa enrollment aron mahibal-an kung adunay ginikanan sa mga estudyante nga miyembro sa law enforcement o licensed gun owner, nga mahimong gamiton sa kapolisan alang sa monitoring. Ang mga lakang gilakip sa mga diskusyon ubos sa Cebu Safe Schools Program ug Cebu Safe School Committee nga gipatuman pinaagi sa executive order ni Gobernador Pamela Baricuatro. Matud ni Board Member Malcolm Sanchez, ang diskusyon gitumong sa pag-ila sa mga kakulangan sa seguridad ug pagpalig-on sa pagpangandam batok sa posibleng hulga sa mga estudyante ug magtutudlo. (BANAT NEWS)